OÉ-CUSSE, 05 setembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), segunda ne’e hatuur fatuk dahuluk ba projetu abitasaun sosiál hodi harii uma fatuk hamutuk 36 hodi troka uma tali hosi komunidade afetadu sira-nia uma hamutuk uma-kain 36 iha suku Lifau, Taiboko no Suni-Ufe tanba afeta iha konstrusaun estrada nasionál Ponte Noefefan, sub-rejiaun Pante Makasar liga ba sub-rejiaun Nítibe.
Notísia relevante: Terra Propriedade rejista parsela 339 afeta ba konstrusaun estrada nasionál Pante Makasar-Nítibe
Prezidente Autoridade RAEOA, Arsénio Paixão Bano, Governu liuhosi Autoridade RAEOA kumpre ona nia promesa hodi troka komunidade sira-ne’ebé hetan afeta, uma troka uma, rai troka rai ou hetan kompensasaun inklui ai-oan sira-ne’ebé produtiva.
Tuir nia, kona-bá rai ninian agora Autoridade RAEOA liuhosi Sekretariu Rejional Asuntu Terras no Propriedades hahú halo publikasaun mapeamentu rai iha zona sentrál hosi Sakato, Suku Nipani to’o Tono, Suku Cunha, ida-ne’e mós sei halo tán publikasaun ba rai ne’ebé maka hetan afeta hosi estrada sei haree atu halo kompensasaun ba rai de’it.
“Ohin ne’e ita lansa uma 36, ha’u haree komunidade sira-nia uma tali ho bebak, ohin autoridade troka ho uma kalen ho fatuk, ohin ita haree família ida, inan ho oan, sira hetan hotu uma, ida-ne’e la haree ba família maibé semak nia uma hetan afeta iha projetu estrada ne’e autoridade iha obrigasaun atu selu ka sei troka,” Arsénio Paixào Bano, ko’alia iha suku Taiboko.
Nune’e nia husu autoridade lokál sira iha suku Lifau, Taiboko no Suni-Ufe, Ofisiál Polísia Suku (OPS) hamutuk ho skompañia atu koopera ho komunidade sira nune’e ezekuta projetu abitasaun sosiál ne’e tuir termu kontratu.
“Ita iha uma 120 tenke halo iha estrada nasionál ne’e, ohin foin maka lansa uma foun 36 ba iha faze primeiru, faze segundu sei iha uma 18 sei halo publikasaun rezultadu iha tempu badak, tan ne’e ha’u fiar, kompañia sira-ne’ebé ezekuta persiza finaliza antes dezembru tanba tinan foun ha’u hakarak hare uma foun iha estrada nasionál Noefefa-Oenunu,” nia fó hanoin.
Notísia relevante: PR agradese komunidade tanba kontribui iha projetu estrada nasionál ba Nítibe
Xefe suku Taiboko, Joaquim Tafin, nia reprezenta xefe suku Lifau ho Suni-Ufe, hakarak agradese ba Governu liuhosi Autoridade RAEOA tanba ho inisiativa ne’e, bele tau prioridade mós ba komunidade afetadu sira hodi troka sira-nia uma tali ho bebak tau fali uma fatuk.
“Ho nune’e ha’u lori komunidade afetadu sira-nia naran, hakarak hato’o agradese ba Governu tanba iha hanoin di’ak, atu responde preokupasaun komunidade sira-nian tanba hetan afeta iha projetu estrada nasionál ne’e, ne’ebé ohin ami mós rona katak, iha tempu badak sei halo mós kompensasaun ba ai no rai, ida-ne’e ita espera bele realiza iha tempu badak, nune’e komunidade sira bele senti,” nia orgullu.
Entretantu, projetu abitasaun sosiál hamutuk 36 ne’e iha modelu tipu tolu, tipu A uma ho médida 13×10, tipu B médida 9×12 no tipu C 7×6.
Tipu A, ezekuta hosi kompañia Rumbia Luliheni Unip.Lda valór kontratu $102,281.92 ho durasaun kontratu fulan haat, tipu C ezekuta hosi kompañia Nunmabun Unip Lda, valór kontratu $369.681.96.
Nune’e mós iha tipu C seluk ezekuta hosi kompañia Sikoneroc Unip.Lda valór orsamentu $228.928.99, durasaun ba projetu hirak-ne’e fulan haat.
Purtantu kona-bá B nian daudaun ne’e sei iha prosesu aprovizionamentu.
Notísia relevante: Joventude Lifau hato’o proposta ba Autoridade tenke integra iha projetu estrada nasionál
Jornalista: Abílio Elo Nini
Editór: Evaristo Soares Martins
