iklan

ERMERA

CBRN-TL: Númeru Estatístika nasionál ba EhD iha 2022 hamutuk 17.061

CBRN-TL: Númeru Estatístika nasionál ba EhD iha 2022 hamutuk 17.061

Diretora Community Based Rehabilitation Netword Timor-Leste (CBRN-TL), Norberta Soares da Crus. Imajen Tatoli/Osória Marques.

ERMERA, 05 setembru 2023 (TATOLI)—Diretora Community Based Rehabilitation Netword Timor-Leste (CBRN-TL), Norberta Soares da Crus, hateten, númeru estatístika nasionál iha tinan 2022, ne’e hatudu katak Ema ho Defisiénsia (EhD) iha Timor-Leste hamutuk 17.061 ne’ebé kompostu hosi mane 8.517 no feto 8.544.

“Kona-ba númeru ema ho defisiénsia ba tinan ne’e ita preokupa no oinsá enumeradór sira rekolla dadus ida-ne’e. Dadus estatístika nasionál mós seidauk hatudu kada munisípiu. Entaun, dadus ne’e sai problema ba ami organizasaun ema ho defisiénsia hodi utiliza ba advokásia. Espera katak futuru estatístika bele haree no fahe kada munisípiu no ema ho defisiénsia hira iha kada munisípiu,” nia hateten ba Agência Tatoli iha salaun Sekretariadu Tékniku Administrasaun Eleitorál (STAE) munisípiu Ermera, tersa ne’e.

Diretora CBRN-TL hatutan, ida-ne’e akontese tanba servisu autoridade komunitária ho servisu saúde Munisipál mak lá másimu ba asuntu defisiénsia iha Ermera.

“Servisu Saúde Munisipál Ermera seidauk to’o iha komunidade defisiénsia hela bá. Tanba tuir observasaun ne’ebé ami iha katak sensibilizasaun ba ema ho defisiénsia sei menus hosi saúde Ermera no autoridade lokál. No, dala barak depende ba sosiedade sívil liuliu organizasaun ema ho defisiénsia mak tun direita halo sensibilizasaun kona-ba oinsá asesu ba saúde, edukasaun, justisa ba fatin públiku sira,” nia hateten.

Nune’e hanesan organizasaun ema ho defisiénsia hakarak rekomenda ba lina ministerial sira hotu iha Ermera liuliu xefe suku sira tanba sira mak besik liu nia komunidade atu halo sensibilizasaun no husu atu ema ho defisiénsia mós envolve no partisipa iha atividade saida de’it mak iha suku.

“Maibé amostra responde ba ami-nia peskiza no observasaun liga ema ho defisiénsia asesu ba saúde inkluzivu ne’e iha suku Poetete, Ponilala, Fatukeru no Riheu, ami konsege identifika ema defisiénsia hamutuk 130,” nia hateten.

Entaun hosi númeru respondente ne’e hatudu ema ho defisiénsia munisípiu Ermera barak tanba seidauk konta ba 48 hosi totál suku 52 iha postu neen (6), postu suku Ermera Vila, Railaco, Gleno, Atsabe, Letefoho, Hatulia B.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!