CRS halo sensibilizasaun kona-ba programa nutrisaun ba feto adolsente iha Covalima
COVALIMA, 05 setembru 2023 (TATOLI)–Organizasaun Internasionál Catholic Relief Services (CRS) partilla informasaun kona-ba programa nutrisaun ne’ebé foku ba feto adolsente no inan foinsa’e ba entidade sira iha Covalima.
“Ita-nia programa ne’ebé atu implementa iha munisípiu Covalima mak foku ba programa nutrisaun ba feto adolesente, hahú hosi idade 12 to’o 19 no inan foinsa’e hahú hosi idade 21 to’o 26, atu fahe informasaun kona-ba nutrisaun ba entidade sira iha nivél munisípiu,” Jestór Projetu CRS, Júlio Pinto hateten ba jornalista-sira iha salaun AMC Sukaer Laran, tersa ne’e.
CRS hahú sensibiliza ona nia programa ba entidade relevante sira-ne’ebé foku liu, servisu ba iha área nutrisaun no halo ona diskusaun ba mapeamentu hodi identifika postu administrativu ne’ebé ONG seidauk kobre.
Atividade ne’ebé CRS sei hala’o mak fahe informasaun kona-ba nutrisaun ba eskola sira-ne’ebé servisu hamutuk ho Ministériu Saúde no Edukasaun hodi haree programa iha eskola ne’ebé foku ba adolesente sira.
Aleinde fahe informasaun kona-ba nutrisaun sei haree mós atividade merenda eskolár, la apoiu materiál sei fó apoiu informasaun agrikultura iha nivél eskola, ne’ebé programa apreende hamutuk no iha suku foku ba inan-aman iha oan feto foinsa’e, iha atividade rai no empresta osan, inan-aman kontrola nia-oan feto nutriente liuhosi atividade rai no empresta osan sira bele iha kapasita atu sosa no bele asesu ai-han ne’ebé ho nutritivu.
Xefe programa Servisu Saúde Munisípiu Covalima, Agapito de Jesus, hateten organizasaun Internasionál, Catholic Relief Services (CRS) sei implementa sira-nia programa hodi atende foku liu adolesente sira.
“Catholic Relief Services (CRS) sei foku atende ita-nia inan sira no alin feto adolsente ba kazu má nutrisaun nune’e ohin loron dahuluk ba endidade sira hodi atende atividade refere,” nia dehan.
Catholic Relief Services nia atividade halo promosaun hodi hakbiit no haforsa inan-feton sira-nia koñesemetu bele hadook aan hosi má nutrisaun molok forma família.
Durante ne’e, Srvisu Saúde Covalima iha departamentu kona-ba nutrisaun maibé seidauk iha indikadór espesífiku ba adolsente foku de’it ba estudante sira no ho idade menus tinan lima ho inan isin-rua no inan fó susu bebé.
Tuir dadus, hosi servisu saúde munisípiu Covalima rejista labarik ho idade menus tinan lima inan isin-rua ho inan fó susu bebé 49% má nutrisaun kompara ho tinan kotuk tuun, tanba antes ne’e Covalima okupa númeru rua atinje 52% maibé agora iha ona númeru neen (6) atinje 49%.
Jornalista : Celestina Teles
Editór : Cancio Xinenes
