DILI, 05 setembru 2023 (TATOLI)—Deputadu hosi bankada CNRT iha Parlamentu Nasionál (PN), Saul Amaral, husu IX Governu Konstituisionál liuhosi ministériu tutela atu funsiona merkadu iha fronteira Mota-Masin ne’ebé konstrui iha governasaun anteriór to’o agora abandona hela.
“Liga ho área kompeténsia MCIA nian, iha tinan barak Governu anteriór konstrui merkadu ida iha fronteira Mota-Masin maibé to’o agora la funsiona. Hanoin katak, ita gasta orsamentu Estadu ho prezensa IX Governu atu haree asuntu ne’e, nune’e bele funsiona fila-fali tau jestaun ne’ebé di’ak,” nia levanta liuhosi reuniaun plenária PN, tersa ne’e.
Nune’e, tuir nia, populasaun sira hosi viziñu Indonézia no Timor-Leste liuliu iha liña fronteira bele hala’o atividade ekonómika iha liña fronteira.
Iha parte seluk, Deputada CNRT, Cedelízia dos Santos, preokupa kondisaun tratamentu iha merkadu Taibesi-Dili, nune’e husu Governu atu organiza didi’ak.
“Ha’u hela besik iha merkadu Taibessi, atu fó hanoin ita atu haree didi’ak merkadu sira-ne’e, ita nia ema vendedór sira iha ne’eba atu uza de’it haris fatin mós bee bee iha merkadu Taibessi kuaze laiha. Ema barak faan sasán iha merkadu maiória mak hela de’it iha merkadu, entaun tratamentu tenke dignu uitoan,” nia hateten.
Jornalista : Nelson de Sousa
Editór : Cancio Ximenes
