VIQUEQUE, 05 setembru 2023 (TATOLI)–Reprezentante feto hosi postu administrativu Uatucarbau, munisípiu Viqueque, Helda de Carbalho, hateten, feto potensiál hosi Uatucarbau protu ona atu kompete ho mane iha eleisaun suku ne’ebé sei realiza iha loron 28 outubru 2023.
“Ami feto iha ona preparasaun ba lideransa no ami prontu atu kompete ho mane sira iha eleisaun suku agora. Ami feto ida-idak ho ninia konsiénsia rasik tanba ami hanoin feto labele iha kotuk beibeik, maibé tenke filleira ida ho maluk mane sira,” Helda de Carvalho, hateten hafoin partisipa atividade edukasaun sívika iha salaun postu Uatucarbau, tersa ne’e.
Nia dehan, durante ne’e feto potensiál iha Uatucarbau hetan ona formasaun hosi Asosiasaun Feto Potensiál munisípiu Viqueque kona-ba líderansa nian.
“Ho koñesimentu sira ne’ebé ami hetan, motiva ami hakarak sai líder iha ami-nia suku no aldeia sira iha postu Uatucarbau. Ohin mós ami rona prosesu eleisaun no kandidata-an ba suku hosi Komisaun Nasionál Eleisaun (CNE, sigla portugés), ha’u fiar iha eleisaun ba tinan ida-ne’e ami-nia maluk sei kompete,” nia akresenta.
Biban ne’e, nia husu maluk feto sira atu kandidata-an ba Xefe suku, Xefe aldeia no delegada tanba lei fó dalan.
“Atu manán ka lakon la’ós kestaun, maibé manán ita sai inan ida hodi lidera ba maluk feto no inan aman sira. Eleisaun suku tinan ida-ne’e ha’u sei kandidata-an ba Xefe aldeia Uatu-Maloli, suku Uani-Uma,” nia subliña.
Notísia relevante : CNE fó edukasaun sívika ba eleitór-sira iha Viqueque
Iha biban hanesan, Ofisiál CNE destakadu munisípiu Viqueque, Olávio da Costa Monteiro, hateten, eleisaun demokrátiku ema hotu-hotu iha diretu hodi kandidata-an maibé tenke hetan apoia hosi komunidade rejistadu iha suku ida.
“Eleisaun suku sai prioridade ba suku ho karakter komunitária, la’ós polítika. Tanba ne’e ami halo sosializasaun ba eleitór sira atubele hatene kona-ba prosesu eleisaun suku atu eleitór sira iha koñesimentu ba prosesu,” nia tenik.
Nune’e mós, tuir Xefe suku Irabin de Cima, Lino de Jesus, ema barak maka hakarak kandidata-an ba Xefe suku, Xefe aldeia no Delegadu, maibé barak maka seidauk kompreende prosesu, tanba ne’e ho presenza CNE bele introdús prosesu eleisaun suku.
“Ohin loron ema barak maka hakarak kandidata-an, maibé barak maka seidauk kompreende kona-ba prosesu eleisaun suku. Maibé ho prezensa CNE ami bele hateten kada kandidatu ninia apoiante hira maka bele prienxe rekezitu ba Xefe suku no Xefe aldeia,” Líder komunitáriu hato’o.
Nia nota katak eleisaun suku sei lidera hosi Autoridade komunitária no ema hotu bele kandidata-an tanba nasaun Timor-Leste adota demokrasia,” nia realsa.
CNE realiza atividade edukasaun sívika iha suku tolu hanesan Uani-Uma, Irabin de Cima no Irabin de Baixo, postu Uatucarbau, ne’ebé hetan partisipasaun hosi ema na’in-100 resin kompostu hosi Administradór postu, Autoridade Seguransa Eskuadra Polísia Uatucarbau, inklui inan aman.
Jornalista : Vitorino Lopes da Costa
Editora : Julia Chatarina
