DILI, 05 setembru 2023 (TATOLI) – Institutu Nasionál Siénsia no Teknolojia (INCT, sigla portugés) sei kria repozitóriu dijitál hodi garante obra husi investigasaun sientífika sira ne’ebé mak peskizadór sira rekolla ona iha terrenu. Nune’e institutu sei prevee rihun $200 iha Orsamentu Jerál Estadu tinan oin hodi bele instala software dijitál ne’e.
Prezidente Konsellu Ezekutivu INCT, José Cornélio Guterres, hatete institutu esforsu hela hodi kria repozitóriu dijitál ida atubele armazena rezultadu peskiza sira ne’ebé mak publika ona iha jornál internasionál ka jornál sientífiku nian.
“Atu konserva hotu matéria estudu iha fatin ida depois sé maka hakarak halo estudu ruma bele asesu”, dirijente ne’e afirma iha selebrasaun Loron Nasionál Ensinu Superiór no Loron Mundiál ba Siénsia ne’ebé mak realiza iha salaun Katedrál, Vila Verde, ohin.
Dezde 2019, institutu ne’e realiza ona atividade investigasaun ba projetu hamutuk 47 ne’ebé haree kona-ba Edukasaun, Ekonomia, Kultura no Inkluzaun Sosiál.
Iha peskiza ne’e, INCT hasoru difikuldade boot tanba seidauk iha laboratóriu própriu ida ba atende amostra sira ne’ebé maka peskizadór sira rekolla no daudaun sira uza hamutuk de’it iha Laboratóriu Nasionál. Tanba ne’e, INCT rekomenda ba Governu atu haree preokupasaun sira ne’e hodi kria laboratóriu própriu bainhira peskizadór sira atu halo investigasaun sira bele uza ho adekuadu.
INCT nu’udar instituisaun ida ne’ebé hamriik atu responde ba dezafiu sira ne’ebé maka akontese iha rai-laran liuhusi rezultadu peskiza sira.
INCT iha nia misaun ba promosaun kontínua ba avansu koñesimentu sientífiku no teknolójiku iha Timor-Leste, esplora oportunidade ne’ebé ko’alia iha domíniu sientífiku no teknolójiku hotu ho potensiál atu atinji padraun internasionál kriasaun koñesimentu nian, no estimula nia difuzaun no aplikasaun prátika enkuantu fatór dezenvolvimentu no melloria moris di’ak populasaun nian.
Notísia relevante: INCT prepara instala software atu fasilita matéria sientífika ba peskizadór sira
Jornalista: Tomé Amado
Editora: Maria Auxiliadora
