iklan

ERMERA

Infraestrutura bázika sai dezafiu boot ba postu Ermera Vila

Infraestrutura bázika sai dezafiu boot ba postu Ermera Vila

Administrador Postu Administrativu Ermera Vila, Munisipiu Ermera, Alexandre dos Santos (Imagem Tatoli/Filomeno Martins.

ERMERA, 05 setembru 2023 (TATOLI)—Administradór Postu Administrativu Ermera Vila, Alexandre dos Santos, hateten infraestrutura bázika iha Postu Ermera Vila hanesan bee-moos, eletrisidade no estrada sai dezafiu ba Postu Ermera Vila, munisípiu Ermera.

“Primeiru buat tolu, bee-moos, ahi no estrada mak sai dezafiu boot maibé fazeadamente ita hatama ona proposta infraestrutura iha munisípiu Ermera no tempu besik bele realiza,” nia hateten ba Agência Tatoli iha Ermera, tersa ne’e.

Nia hateten, sai dezafiu tanba distánsia entre suku ba suku no suku ba aldeia ho kondisaun dalan ne’ebé la di’ak no presiza orsamentu, tanba Orsamentu Retifikativu labele kobre asuntu refere.

“Tempu besik halo konstrusaun maibé fazeadamente no nia orsamentu ami hatama ona Planu Integradu Dezenvolvimentu Munisipál Ermera nian. Iha Postu Administrativu Ermera Vila, aldeia ne’ebé seidauk asesu ba eletrisidade mak iha Taklela, Tidbesi no iha Suku Ponilala no Leguemea nian mak instalasaun eletrisidade ne’ebé la’o hela hela. Suku seluk, asesu ona liña eltrisidade,” nia hateten.

Kona-ba bee-moos ho estrada prosesu konstrusaun la’o hela no nia atinjementu foin to’o 50%, nia hateten, konstrusaun estrada ho projetu boot sira sei tama ba orsamentu tinan oin nian.

Agora programa planu konstrusaun ne’e hein orsamentu 2024 nian, ba Orsamentu Retifikativu ne’e sei labele kobre tanba nia kobre de’it ba fulan tolu mak haree liubá saláriu funsionáriu kazual iha Ermera.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!