DILI, 05 setembru 2023 (TATOLI)—Prezidente Komisaun F trata asuntu Saúde iha Parlamentu Nasionál, Maria Gorumali Barreto, husu Ministériu Saúde (MS) atu tau iha planu iha tinan 2024 rekruta profisionál saúde hodi koloka ba postu saúde sira-ne’ebé sei menus rekursu umanu.
“Bazeia ba observasaun no fiskalizasaun rekursu umanu iha saúde liuliu ba postu saúde no sentru saúde falta tebes rekursu umanu. Rekomenda ba Ministériu Saúde oinsá atu identifika fila-fali ba postu no sentru saúde, ospitál referál hodi haree didi’ak hanoin ba planu iha tinan 2024 bele oinsá iha rekrutamentu hodi responde ba postu saúde balun ne’ebé presiza rekursu umanu,” nia hateten liuhosi reuniaun plenária PN, tersa ne’e.
Nia mós husu Ministériu Saúde atu tau atensaun ba médiku batrak ne’ebé balun iha ospitál referál, sentru saúde mak agora retira mai hotu mai iha Dili, tanba ne’e mak iha munisípiu no sentru saúde ho postu saúde hasoru problema ba rekursu umanu.
Aliénde ne’e, nia kontinua levanta problema oksijéniu ne’ebé foti bebe’ik ona presiza tebes atu distribui ba postu saúde sira, tamba moras barak liu iha Timor-Leste mak ispa, bainhira pasiente sira ba halo tratamentu labele atende tamba laiha oksijéniu, nune’e refere ba sentru saúde.
Jornalista : Nelson de Sousa
Editór : Cancio Ximenes
