iklan

ERMERA

Prezidente AME: “Kualker tipu konstrusaun tenke kompleta ho asesibilidade ba EhD”

Prezidente AME: “Kualker tipu konstrusaun tenke kompleta ho asesibilidade ba EhD”

Prezidente Autoridade Munisípiu Ermera (AME), Eusébio Salsinha. Imajen Tatoli/Osória Marques.

ERMERA, 05 setembru 2023 (TATOLI)—Prezidente Autoridade Munisípiu Ermera (AME), Eusébio Salsinha, hateten governasaun ida-ne’e sei kontrui instituisaun hotu-hotu iha munisípiu Ermera kompleta ho asesibilidade ba ema ho defisiénsia sira atu sira bele asesu.

“Kualker tipu konstrusaun Governu nian tenke kria kondisaun, nune’e ema defisiénsia bele asesu,” Prezidente autoridade hateten ba Tatoli, iha salaun Sekretariadu Tékniku Administrasaun Eleitorál (STAE) Munisípiu Ermera, tersa ne’e.

Autoridade Munisipál ne’e hatutan, ho prezensa atividade Community Based Rehabilitation Netword Timor-Leste (CBRN-TL) bele fahe informasaun kona-ba fó atendimentu ema ho nia iha sosiedade liuliu iha Sentru Saúde Munisipál Ermera.

“Atividade CBRN-TL nian ne’e di’ak no oinsá ita integra hanoin sira, nune’e insá fó atendimentu ba ema ho kondisaun defisiénsia, nune’e sira labele sente marjinalizadu, sente tratamentu ba sira ne’e dignu duni tuir ema, norma no kondisaun ida-idak nian,” nia hateten.

Xefe Departamentu ba Programa iha Sentru Saúde Munisipál Ermera, Manuel Soares, hateten, tinan ne’e ba oin saúde munisipál iha ona planu atu instala rampa iha sentru no postu saúde sira nune’e ema ho defisiénsia (EhD) bele asesu.

“Ita-nia konstrusaun sira ba sentru saúde sei kompleta ho pakotemente fasilidade ba ema ho defisiénsia sira, ita ho ema kondisaun defisiénsia hanesan iha Maromak nia oin no iha nasaun. Tanba ne’e, ita sei la husik ema ida iha kotuk, ita hamutuk mak hodi lori dezenvolvimentu munisípiu ne’e ba futuru ne’ebé di’ak,” nia hateten.

Xefe ne’e esplika, iha 96% mak seidauk iha fasilidade ba ema ho defisiénsia sira inklui rekursu umanu ne’ebé atende sira.

“Ita iha de’it 4% mak asesu ba saúde inkluzivu iha sentru ne’e maibé ida-ne’e médiku, parteira, infermeira ba atendimentu jerál nian. Sira fó atendementu 4%, tanba sira hetan formasaun liga ho atendimentu ba defisiénsia sira. Ida-ne’e ita rekoñese no ita planu atu instala fasilidade no buka médiku espesializada ba área defisiénsia, nune’e bele atende ita-nia maluk sira,” nia dehan.

Diretora Community Based Rehabilitation Netword Timor-Leste (CBRN-TL), Norberta Soares da Crus, hateten kondisaun ema ho defisiénsia ne’e hola papel importante iha programa dezenvolvimentu iha komunidade no munisípiu, nune’e presiza tau atensaun.

“Atu integra ema ho kondisaun defisiénsia ne’e hola papel importante iha programa dezenvolvimentu iha komunidade, munisípiu nune’e atu labele haluha ema ho defisiénsia. Ita hakilar kona-ba Objetivu Dezenvolvimentu Sustentável katak la husik ema ida iha kotuk. Maibé realidade ne’ebé iha sei husik ema defisiénsia iha kotuk,” diretora CBRN-TL dehan.

Norberta hateten atividade ne’e hetan suporta hosi USAID hodi fó kapasitasaun ba komunidade defisiénsia atu advokásia ba sira-nia direitu.

Tanba, tuir dadus família nian iha 2022 ne’e hatudu katak ema ho defisiénsia hamutuk 17.061 kompostu hosi mane 8.517 no feto 8.544.

“Nune’e, husu ba autoridade komunitária, munisipál, lina ministeriál atu kontribui ba mudansa, ba ema ho defisiénsia sira iha futuru ne’ebé di’ak,” nia rekomenda.

Liga ho lei no polítika iha Timor-Leste, nia hateten, Konstituisaun RDTL artigu 57, artigu 16 no artigu 21 ne’e hatudu ba prestadór sira, entaun ida-ne’e Ministériu Saúde promove ona prestadór saúde sira liuliu oinsá fornese atendimentu ba ema ho defisiénsia sira.

“Iha polítika atendimentu saúde inkluzivu iha VI Governu KOnstitusionál, tinan 2016 no rezolusaun asesibilidade ba fatin públiku (07/MOP/VIII/2020). Katak, ita-nia Governu liuhosi Ministériu Obra Públika bainhira halo konstrusaun edifísiu públiku sira tenke konsidera asesibilidade ba infraestrutura iha Ermera. Ita mós iha Planu Asaun Nasional Ba Ema Ho Defisiensia inklui Planu Estratejia Saúde Mentál,” nia dehan.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!