Sniper Mouzinho-Gally iha kualifikasaun AFC 2024
DILI, 05 setembru 2023 (TATOLI) – Ekipa selesaun Timor-Leste atualmente iha ona Kwait hodi halo preparasaun ba jogu kualifikasaun Asian Football Confederation (AFC) ne’ebé sei hala’o semana ida ne’e iha Kwait no sei reforsa hosi jogadór estrela na’in-rua Mouzunho de Lima no Paulo Gally Freitas.
Iha jogu ne’e, Timor-Leste tama iha grupu F hamutuk ho Iraq, Kwait no Macau, maske ho nasaun mesak jigante iha ASEAN maibé selesaun Lafaek hetan asisténsia hosi jogadór estrela na’in-rua ne’ebé naran boot iha Indonézia no Kamboja.
Iha Liga Primeira Indonézia, Gally Freitas halo nia jogu brillante tebes iha ekipa PSS Semarang, to’o agora hanesan mellór markadór provizóriu ho golu lima no Mouzinho mós hanesan hatudu hela jogu brillante iha Viscaha FC.
Ho prezensa jogadór na’in-rua ne’e la dúvida ba kapitaun selesaun nasionál U-23 João Bosco Halle tanba bele sai ona alvu ba Timor-Leste.
“Ho sira na’in-rua nia prezensa hamutuk ho ami, halo ami forsa liután atu hala’o jogu tolu ne’e ho susesu, maibé buat hotu sei termina iha menutu 90 nia-laran”, Halle dehan ba Agência TATOLI liu hosi whatsap, tersa ne’e.
Mouzinho Barreto orgullu ba FFTL ne’ebé fó nafatin konfiansa ba nia hodi reforsa selesaun nasionál no sei hatudu jogu ne’ebé di’ak.
“Ha’u sei hatudu jogu ne’ebé di’ak, joga ba ha’u nia nasaun, ha’u sei joga ho fuan no laran tomak, atu hatudu jogu ho responsabilidade”, nia dehan.
Tuir oráriu ne’ebé iha, Timor-Leste vs Kwait iha 07 setembru iha Estádiu Kwait Sport Club, iha 10 setembru Timor-Leste vs Iraq iha Estádiu Ali Subah Al-Salem no iha 13 setembru Timor-Leste vs Macau iha Estádiu Ali Subah Al-Salem.
Hosi jogu hirak ne’e, Timor-Leste hatudu rezultadu pozitivu mak iha direitu absoluta atu halo jogu kontinuasaun ba AFC iha tinan oin, bainhira la hatudu rezultadu di’ak mak Timor-Leste tenke elimina hodi hein oportunidade seluk.
Lista jogadór ne’ebé sei joga iha kualifikasaun AFC
Alexandre Morreira, Anizio Correia, Cristevão Moniz Fernandes, Elias Mesquita, Fernando Carvalho, Filonito Nougueira, Freteliano Santos, Jhon Frith, João Bosco HalleJunildo Pereira, Kornelis Portela, Luis da Silva, Luis Figo Pereira, Luis Figo Pinto, Mario Quintão, Marques de Carvalho, Mouzinho Barreto de Lima, Olgar Xavier, Orcelio da Silva, Paulo de Jesus, Paulo Gally Freitas, Ricardo Bianco, Zenivio Gostavo.
Esperiésnsia Mouzinho iha mundu futeból
Mouzinho de Lima hahú kareira hanesan futebólista iha tinan 2010 ho idade ualu, hosi treinadór ne’ebé koñesidu ho naran Mister Kim no konsege hamutuk ho ekipa U-12, maske iha tempu ne’ebá Mouzinho labele liu iha selesaun hodi ba joga iha Koreia Súl tanba tinan seidauk toʻo.
Maske nune’e, Mouzinho la lakon esperansa maibé nafatin iha vontade tuir treinu iha kampu Federasaun Futeból Timor-Leste (FFTL).
Iha tinan 2012, Mouzinho kompleta ona tinan 12 ho vontade jogu ne’ebé iha fó ona konfiansa ba treinadór Kim, hili nia tama iha selesaun nasionál U-12 hodi reprezenta Timor-Leste ba joga iha Koreia Súl, Mouzinho hamutuk ho nia amigo sira partisipa iha kompetisaun rua hanesan kopa MBC no kopa Jion-ji, maibé iha jogu rua ne’e só MBC de’it mak Mouzinho ho nia kolega sira tama to’o finál maibé iha tiru penalidade ekipa derrota no sai segundu lugar de’it.
Iha 2013, Mouzinho nafatin hetan konfiansa hosi treinadór Kim hanesan jogadór U-14 hamutuk ho nia kolega sira nafatin reprezenta Timor-Leste ba tuir kompetisaun Jion-ji toʻo ikus sai hanesan primeiru lugar.
Iha momentu ne’e, Timor-Leste konsege tama finál kontra Portugál ho rezultadu eskore 1-0 hodi sai primeiru lugar.
Bainhira fila tia hosi kopa Jion-ji iha 2013 niaklaran, Mouzinho nafatin hetan konfiansa hamutuk ho nia kolega sira fila hikas ba Koreia hodi tuir festivál futeból nian ne’ebé partisipa hosi nasaun barak no Timor-Leste konsege saihanesan segundu lugar tanba la konsege manán Vietname ho jogu bolu “seven site” ka joga na’in hitu-hitu.
Nune’e, iha 2014, nia dala ida tan hamutuk ho selesaun fila hikas ba Koreia tuir kompetisaun Jion-ji la konsege manán tanba lakon ho Barcelona iha oitavu finál.
Ho prestasaun ne’e, iha 2015 jogadór ne’e hetan kedan konfiansa sai ba jogadór iha selesaun nasionál U-16 hamutuk ho nia amigo sira reprezenta Timor- Leste ba joga iha Brunei Darusalam iha festival AFC nian ne’ebé konsege sai segundu lugar.
Iha 2016, Mouzinho nafatin hamutuk ho nia kolega sira reprezenta Timor-Leste iha festival CPLP nian ne’ebé hala’o iha Cabo-Verde, ne’ebé Timor-Leste la konsege hetan vitória iha eventu mundiál ne’e.
Maske idade seidauk toʻo 19, maibé ho prestasaun ne’ebé extra-ordináriu ka brillante tebes, nune’e iha 2018 hetan ona konfiansa hosi treinadór Kim hodi partisipa iha jogu AFF iha Surabaya-Indonézia maibé lakon de’it iha faze grupu tanba iha jogu primeiru ho Myanmar empata, segundu ho Malázia mós empata, no konsege manán Brunei, maibé jogu ikus kontra Cambodia lakon ne’ebé la konsege hakat ba semi-finál.
Bainhira fila hosi AFF liu de’it loron ida kontinua kedan arranka ba São Tome e Prinsípe partisipa festival CPLP nian ho nune’e jogadór ne’e nafatin iha vontade la sente kole tanba iha nia kakutak futeból mak nia futuru.
Iha 2018, Mouzinho hetan nafatin fiar hosi treinadór Eduardo Pereira, maske sei idade 16 hamutuk ho selesaun U-21 reprezenta Timor- Leste ba joga iha kompetisaun Hasanal Bolkiah no Timor Leste konsege hetan primeiru lugar.
Haree ba prestasaun ne’ebé di’ak tebes, iha 2019, Mozinho hetan ona konfiansa hosi treinadór selesaun nasionál U-23, Norio Sukitete.
Ho konfiansa hirak ne’e iha treinadór, Fabio Maciel da Silva nia tempu 2021 bolu nafatin Mozinho hamutuk ho nia kolega ekipa U-23 partisipa iha jogu AFF nian iha Cambodia to´o ikus Timor-Leste sai terseiru lugar ba dala uluk.
Iha 2021 to’o 2022, Mouzinho nia performe di’ak tebes iha AFC, no Sea kompetisaun AFF Games Vietname halo klube Tiger laran monu hodi kontrata atu reforsa klube ne’e.
Enkuantu, esperiénsia klube sira bainhira Futebol Amadora hamrik iha 2015 no jogu lao másimu iha 2016, jogadór Mozinho hamutuk kedan ho SLB Laulara ne’ebé Prezidente Klube mak líder nasionál Kay Rala Xanana Gusmão.
Hamutuk ho SLB Mouzinho konsege lori sorte ba SLB tanba sai kedan primeiru lugar ba liga Timor-Leste.
Mouzinho hamutuk ho SLB hahú iha 2016 toʻo 2021, nune’e, iha 2021 nia klaran nia hetan kontratu hosi Boavista Timor atu reforsa klube ne’e, maibé jogu la la’o tanba Covid-19, nune’e nia deside fila hikas ba SLB.
Biografia
Jogadór Mouzinho, moris iha Maliana, 26 juñu 2002. Oan hosi Mario de Lima no Adelina Barreto.
Nia hanesan oan ikun hosi maun alin na’in-neen, kompostu hosi feto tolu no mane tolu.
Mouzinho hahú nia estudu Pre-Primária iha 2004 toʻo 2005. tama iha Ensinu Primaria iha tinan 2006 toʻo 2011 no iha tinan 2013, tama Ensinu Pre-Sekundáriu Santa Madalena de Canossa Haslaran Dili, iha klase primeira de’it, Madre sira deside hasai nia tanba la tuir ezame.
Nune’e, jogadór ne’e deside ba kontinua fali nia Eskola Pre-Sekundáriu iha Cristal Dili, hafoin ramatkontinua kedan ba Eskola Ensinu Ensinu Sekundáriu FINANTIL-Dili no daudaun nia eskola hela iha Universidade Nasionál Timor-Lorosa’e (UNTL).
Tama iha mudu futeból la’ós ema ida mak obriga, maibé ho vontade rasik tanba nia aman mós hanesan futebólista, maibé ladun másimu tanba dalabarak liu mete iha Boxe.
Esperiénsia badak Gally iha mundu futeból
Ba jogadór fitun ne’e, dezafiu saida no oinsá de’it mak mosu tenke hasoru no simu ho hamnasa-midar, tanba ida-ne’e hanesan luta ida-ne’ebé tenke buka manán ninia an rasik liuhosi luta makas.
Atu manán dezafiu foun iha nia moris, obstákulu ne’e dezafia Paulo Gally Freitas ne’ebé foin halo idade tinan 18 ne’e tenke hasoru dezafiu foun iha nia moris.
Razaun, tanba nia hetan krítika moruk hosi nasaun lubuk no timor-oan balun hodi dun-matak katak nia falsifika tinan-moris iha jogu internasionál Asian Football Federation (AFF) U-15 foin lalais ne’e iha Tailandia.
Maibé, ba jogadór ne’ebé moris iha 31 dezembru 2004 ne’e, la hatudu oin tauk hasoru krítika maibé hetok nia simu-hasoru ho ho oin-midar no hakmatek hodi hasoru presaun hirak-ne’e.
Gally sai sentru atensaun ba adversáriu sira tanba nia iha esesu nu’udar jogadór avansadu ne’ebé badinas kaer bola no matenek kedok bola hodi hatama golu, liuhosi hatudu ninia asesu iha jogu AFF ne’ebé nia eleitu sai mellór markadór ho golu lima iha jogu refere.
Ninia fíziku atlétiku, isin mutin no ain aas. Tanba ne’e, sé matan fihir sala, ema bele haree sala dehan nia la’ós moris iha tinan 2004, maske liuhosi rezulatdu teste médiku iha Sentru Saúde AFF no AFC nian la hatudu faktu katak nia
Estudante Ensinu Sekundáriu Katóliku Kristal ne’ebé hahú nia karreira futeból iha Sentru Juvenil FFTL iha tinan 2011 ne’e hateten, ba oin, mantein nia pozisaun hodi hatudu jogu ne’ebé di’ak liután, nune’e bele lori Timor-Leste nia-naran morin iha mundu liuhosi mundu futeból.
Liafuan “Aifuan monu la dook hosi nia hún” ne’e merese hanesan karimbu ida prega ba oan hosi João da Costa Freitas no Ana Maria Martins Nascimento, tanba fatór jenétiku hosi nia inan ne’ebé uluk hanesan jogadora ida, lori Gally daudaun hanesan jogadór estrela iha Timor- Leste.
“Ha’u-nia pai uluk sei k’ik la mete futeból. Só ha’u-nia maen de’it mak halimar bola. Tanba ne’e, ha’u tuir ha’u-nia maen nia ain-fatin” Oan dalimak hosi maun-alin nain-neen (6) ne’ebé oras ne’e sai jogadór avansadu prinsipál iha klube PSS Semarang ho ne’e ho oin midar.
Antes atu ba joga iha PSS Gally joga iha klube Timor-Leste nian Karketu Dili FC iha époka 2023 konsege lori ekipa kapital Dili nel’e sai kampiaun ba liga.
Ho performe brillante ne’e mak atrai tebes klube Indonézia nia laran hodi fó kedan kontratu ba jogadór timoroan ne’e.
Maske jogadór na’in-rua ne’e sai hanesan alvu prinsipál maibé antes ne’e FFTL halo ona preparasaun ne’ebé másima tebes hosi treinadór Coreano Park Suntae.
Iha fulan kotuk treinadór ne’e lori jogadór sira ba kompete iha kopa AFF maibé la konsege hatudu rezultadu di’ak tanba lakon 1-0 ho Indonézia no 3-1 ho Malazia ho nune’e Timor-Leste la konsege ultrapasa ba oin no iha jogu ne’e la partisipa hosi Mkuzinho no Gally.
Ho nune’e iha jogu AFC nian FFTL liu hosi treinadór deside bolu hikas Mouzinho no Gally hodi reforsa ekipa selesaun U-23 ne’e.
Maibé remeta jogu AFF iha Thailandia jogadór sira ba halo kedan trening Camp iha Korea Súl durante loron 12 no agora dadaun iha ona Kwait hodi halo preparasaun ba jogu.
Jornalista: Hortencio Sanchez
Editór : Zezito Silva
