DILI, 05 setembru 2023 (TATOLI) – Universidade da Paz (UNPZ) marka tan istória iha vida akadémika ninian tanba lansa tan programa ba doutoramentu hamutuk tolu iha Hotel Novo Turismo, tersa ne’e.
Atividade ne’e, partisipa direta hosi Vise-Primeiru-Ministru no Ministru Dezenvolvimentu Rurál no Abitasaun Komunitária Mariano Assanami Sabino no parseiru Universidade internasionál sira iha Azia no Europa.
“Ha’u mai ne’e hanesan konvidadu partisipa iha sira-nia atividade lansamentu ne’e, maibé ha’u husu ba Universidade tenke aposta mós kualidade tuir estandar ne’ebé mak Governu estabelese, tanba edukasaun ne’e ita investe ba ema matenek ne’ebé labele formalidade iha diploma maibé ita hakarak prodúz duni ema ne’ebé matenek no kualidade”, Vise PM Assanami dehan ba Agência TATOLI.
Maibé Governu nafatin iha konfiansa ba UNPAZ tanba halo kooperasaun ho Universidade lubuk ida hosi estranjeiru no sei garante ho kualidade no Governu nafatin halo avaliasaun.
Maske Universidade rasik husu ona ba Governu atu fó lisensa maibé Ministériu Ensinu Superiór seidauk fó resposta maibé iha tempu besik Governu sei halo avaliasaun bainhira prosesu estudu la’o.
Iha fatin hanesan, Reitor Umpaz Adolmando hatete, rekorda UNPAZ iha ona programa lisensiatura no masteradu maibé lansa tan doutoramentu tanba Timor-Leste presiza rekursu atu asegura polítika Governu no estadu nian atu adere ba ASEAN mak UNPAZ hola inisiativa hodi lansa tan programa doutoramentu.
“Ohin UNPAZ marka tan istória ida ba povu no nasaun ida ne’e liuhosi lansamentu programa doutoramentu, ida ne’e atu asegura polítika Governu no Estadu nian tanba Timor-Leste atu adere ba ASEAN, ida ne’e mak UNPAZ iha responsabilidade morál atu asegura polítika ida ne’e, saida mak ami halo mak tenke prodúz rekursu umanu liu hosi edukasaun”, Reitór revela.
Lansamentu ne’e hala’o ba área espesífiku tolu mak Siénsia Direitu, Administrasaun Públika no Siénsia Jestaun Estratéjiku, nune’e tinan oin sei lansa tan programa doutoramentu tolu ba área espesífiku Teknolojia Agríkola no Saúde Públika no Siénsia Medika.
“Bainhira ami hanoin atu lansa programa ba doutoramentu ami prepara ona kondisaun mínimu hanesan fasilidade laboratorium, biblioteka, kondisaun aula no rekursu umanu. Ba rekursu umanu ami la dúvida tanba agora dadaun ami iha doutoramentu hamutuk na’in 45 ne’ebé preparadu no iha professoór doutór iha na’in-haat, lokál no ami halo tan kooperasaun ho parseiru Universidade sira iha rai liur sira sei mai apoiu atu hanorin, ne’ebé ita la dúvida”, nia dehan.
UNPAZ halo ona kooperasaun hamutuk ho universidade 40 iha Azia no Europa atu apoiu UNPAZ iha prosesu edukasaun hotu.
Nia salienta, programa hotu ne’ebé hamosu tenke iha lisensa operasionál hodi tuir avaliasaun ba akreditasaun atu hodi garante kualidade.
“Ba programa tolu ne’ebé ita lansa ne’e tinan ida ona ita haruka ona proposta ba Ministériu Edukasaun Ensinu Superiór atu husu sira mai halo avaliasaun, maibé sira la mai to’o agora entaun ami lansa de’it depois mak sira mai halo avaliasaun tuir presiza hadia iha saida ita hadia atu nune’e ita bele avansa lais liu”, nia relata
Jornalista: Hortencio Sanchez
Editór : Zezito Silva
