Agostu : Pasiente mate iha uma família lori ba emerjénsia HNGV hamutuk 13
DILI, 06 setembru 2023 (TATOLI) – Xefe Departamentu Emerjénsia iha Hospitál Nasionál Guido Valadares (HNGV), Eldegar Lopes Martins, hateten durante fulan agostu, pasiente ne’ebé mak sofre moras fuan ne’ebé mate ona iha uma mak família lori mai iha emerjénsia HNGV hamutuk 13.
“Pasiente sira ne’ebé mate iha uma ka dalan mak família lori mai emerjénsia HNGV hamutuk 13, ne’e ita konsidera problema fuan tanba dalabarak moras hela iha uma mak kleur maibé lakohi lori lalais ba ospitál depois grave ona mak lori halai mai, maibé mate iha uma ka iha dalan mak to’o emerjénsia, entaun ida ne’e ita la bele salva ona”, Eldegar Lopes Martins dehan iha nia kna’ar fatin HNGV, ohin.
Nia informa, família balun husu alta hodi ba halo tratamentu tradisionál, dala barak grave ona, maibé família sira la lori fila sedu, entaun ida ne’e konsidera problema fuan.
“Balun família lori mai maibé mate iha emerjensia HNGV ne’e hamutuk 18 entaun kazu sira hanesan ne’e, ami husu ba família banhira ema ruma moras ona lalais mai ospitál ka sentru saúde ne’ebé mak besik hodi hetan tratamentu sedu husi profisionál saúde sira”, nia relata.
Nia esplika, husi fulan agostu, totál pasiente ne’ebé mak tama iha sala emerjénsia HNGV hamutuk 5.360, husi ne’e fahe ba kategoria tolu. Kategoria dahuluk mak mean signifika kondisaun grave no médiku sira tenke observa lalais ne’e hamutuk 1.342, kategoria kinur signifika moras hela maibé la iha risku ba vida, ne’e hamutuk 2.312, kategoria modok mak pasiente sira ne’ebé mak transfere husi postu saúde sira ne’ebé ho kondisaun kaman hamutuk 1.706.
Númeru pasiente ne’ebé mak ho asidente motór hamutuk 242, asidente ho kareta 44, violénsia doméstika ka pankada hamutuk 11 no na’in ida mak hetan sona.
“Pasiente hirak ne’ebé mak sofre husi violénsia fízika sosiál hanesan ema lao iha dalan hetan tuda hamutuk 10, pankada hamutuk 30 no hetan taa ne’e na’in-tolu. Tenta atu oho an na’in-tolu, sira ne’ebé mak lanu na’in-ida no sira ne’ebé mak hemu baigon no mina rai iha na’in-tolu”, nia subliña.
Eldegar informa, pasiente ne’e’bé baixa iha maternidade liuhusi emerjénsia hamutuk 631, medisina interna hamutuk 405, baixa ba sirurjia hamutuk 161, baixa ba pediatria hamutuk 182, baixa ba acute care na’in-ida.
Jornalista : Felicidade Ximenes
Editór : Zezito Silva
