iklan

ERMERA

Fundu Globál apoiu millaun $12 ba konstrusaun sentru saúde Ermera

Fundu Globál apoiu millaun $12 ba konstrusaun sentru saúde Ermera

Osan Dollar Amerikanu. Imajen/Espesiál

DILI, 06 setembru 2023 (TATOLI)–Xefe Departamentu ba Programa iha Sentru Saúde Munisipál Ermera, Manuel Soares, hateten Fundu Globál apoiu millaun $12 ba konstrusaun sentru saúde munisípiu Ermera iha tinan ne’e.

“Konstrusaun Sentru Saúde Munisipál Ermera hetan apoiu hosi fundu globál ho millaun $12 ne’ebé planu ona atu konstrui iha Suku Fatuquero, postu administrativu Railaco, munisípiu Ermera,” Xefe Departamentu ne’e hateten ba Agência Tatoli iha Ermera, tersa ne’e.

Xefe Departamentu ne’e hateten, Governu prepara ona nia Planta no Kadernu Enkargu (BoQ) no halo ona levantamentu ba fatin refere.

“Ita agora halo ona levantamentu no halo nia BoQ hanesan de’it ba ospitál tolu no ospitál ne’e ho pakotemente mak Ermera, Lautém no Viqueque. Levantamentu no BoQ iha hotu ona no hein outubru tinan ne’e konstrui. Ida-ne’e sedu ona maibé tarde inisiu 2024, tanba nia orsamentu alokadu ona tanba ne’e hein atu konstrui de’it,” nia dehan.

Hosi millaun $12 ne’e kompleta no responde hotu ona ba fasilidade sira ba atendimentu pasiente nian, no konstrusaun foun ne’ebé halo iha Ermera ne’e halo pakotemente signifika kompleta fasilidade asesibilidade ba Ema ho Defisiénsia (EhD) sira.

“Ita presiza kria mós fasilidade ba ema ho defisiénsia, nune’e bele asesu no saúde inkluzivu tenke iha. Tanba tuir Objetivu Dezenvolvimentu Sustentável 2011-2030 ne’e hateten katak la husik ema ida iha kotuk. Entaun bazea ba ida-ne’e konstrusaun edifísiu hotu-hotu iha munisípiu ne’e sei kompleta ho fasilidade defisiénsia nian hanesan tau rampa, haris fatin, no seluk tan,” nia hateten.

Nia dehan, tanba durante ne’e Sentru Saúde Munisipál Ermera ne’e laiha fasilidade ba ema defisiénsia inklui rekursu umanu ne’ebé atende sira, nune’e iha Planu Asaun Anual ne’e munisípiu ho Governu bele ajusta mós asuntu defisiénsia liga ba rekursu umanu nian no presiza buka médiku espesializada ba ema defisiénsia liuliu defisiénsia tilun ho matan nian.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!