DILI, 06 setembru 2023 (TATOLI) – Ministru Defeza (MD) Donanciano do Rosário Gomes hasoru malu ho Governadór Lembaga Ketahanan Nasionál (Lemhanas) Repúblika Indonézia hodi diskute kona-ba oinsa bele fortalese di’ak liután kooperasaun iha área oioin.
“Lemhanas hanesan instituisaun ida ne’ebé bele fó formasaun, nune’e mós halo peskiza ba dezenvolvimentu rai ida nian liuliu ba iha desizor sira, ba ukun na’in sira ne’ebé iha autoridade atu orienta nasaun ida-nia destinu, ne’ebé Lamhanas instituisaun ida ne’ebé importante tebes atu ita halo kooperasaun hodi fó formasaun ba ita-nia forsa sira no ba ema hotu”, Ministru Defeza ba dehan ba jornalista-sira hafoin remata sorumutuk ho Governadór Lemhanas iha Kuartel Jenerál Fatuhada, ohin.
Nia dehan, servisu ne’ebé konkretu sei halo iha kuadru kooperasaun mak Lemhanas sei fó apoiu hotu ba Institutu Defeza Nasionál (IDN) atu bele promove formasaun alta diresaun ba potensiál kandidatura forsa foun no área peskiza ne’ebé Prezidente Repúblika no Governu husu.
“Kooperasaun ita atu halo hamutuk ne’e atu haree ba dezenvolvimentu ekonómiku iha rai-laran no iha fronteira no área seluk ne’ebé importante ba Timor-Leste no Indonézia”, nia dehan.
Nia esplika tan, Lemhanas iha esperiénsia barak ba peskiza, iha esperiénsia barak ba formasaun ho nune’e Timor-Leste tenke gaña sira-nia esperiénsia no matenek hodi halo dezenvolvimentu iha sivíl no militár”, nia esplika.
Lemhanas iha ona orientasaun hosi Governu Timor-Leste no Prezidente Repúblika Indonezia nian atu bele kontribui ba dezenvolvimentu liuhosi planu hamutuk durante tinan 25 ba oin.
“Ida ne’e di’ak ba ita tanba ita-nia dezenvolvimentu bele la’o besik malu ho sira-nia dezenvolvimentu”, nia revela.
Aleinde ne’e, parte rua diskute mós iha área formasaun ba lideransa, administrativa, jestaun, jeo-pilítika, jeo-estratejia no ambiente hotu ne’ebé refere ba dezenvolvimentu nasaun nian.
Iha fatin hanesan, Governadór Lemhanas Andi Widjajanto hatutan, hasoru malu entre parte rua ko’alia liu ba dezenvolvimentu rai rua nian.
“Hasoru malu ho Ministru Defeza Timor-Leste nian, ami ko’alia asuntu importante rua, ida mak kooperassun iha formasaun ba rekursu umanu forsa armada nian atu fó defeza di’ak liubá nasaun, ida mak estratejia polítika nasaun nian iha formasaun lideransa hodi halo kooperasaun durante tinan naruk”, nia relata.
Jornalista: Hortencio Sanchez
Editór : Zezito Silva
