DILI, 06 setembru 2023 (TATOLI)—Prezidente Komisaun E trata asuntu Infraestrutura iha Parlamentu Nasionál (PN), Deputadu Marcos Xavier, kontinua husu ba Ministériu Obras Públika (MOP), atu normaliza lala’is estrada ho ponte ne’ebé hetan estragu hosi dezástre naturál iha fulan-juñu liubá liuliu iha parte kosta súl.
Notísia Relevante: PN husu IGE, I.P koloka ekipamentu mellora intervensaun iha tempu udan
“Iha 05 juñu liu ba akontese inundasaun boot liuliu iha parte kosta súl, Governu liuhosi Ministériu Obra Públika (MOP) nia tékniku sira tun ona ba iha terrenu, no ami komisaun mós ba ona haree katak kondisaun ne’ebé iha munisípiu hitu grave tebe-tebes. Nune’e, ho Orsamentu Retifikativu ne’ebé aprova ona, buka meiu oinsá normaliza tiha estrada ne’e komunidade bele lao hodi sira-nia produtu ba iha merkadu,” Prezidente Komisaun ne’e hateten ba jornalista sira iha uma fukun PN, kuarta ne’e.
Nia hateten, IX Governu Konstituusionál iha vontade atu rezolve inundasaun ne’ebé akontese iha munisípiu hitu ne’ebé afetadu Estrada no ponte aat liuliu iha munisípiu Manufahi.
“Komisaun E ba haree to’o iha ne’eba, haree estrada komesa Rotuto ba to’o iha Same grave tebes. Nune’e, rekomenda ona ba MOP atu responde imediata urjente normaliza tiha hosi IGE-ADE tenke kontinuasaun ba obra ne’e tenke iha, ne’ebé fiar katak Governu liuhosi MOP sei rezolve,” nia hateten.
Deputadu PD, Manuel Henrique Noronha, hateten ho inundasaun ne’ebé akontese fulan hira ba kotuk rezulta estrada no ponte lubun estragu liuliu iha Same, nune’e hanoin ministériu relevante bele tau projetu emerjénsia ruma hodi hadi’a lalais, tanba la kle’ur tan iha fulan-dezembru tama fali ona ba tempu udan.
Jornalista : Nelson de Sousa
Editór : Cancio Ximenes
