DILI, 06 setembru 2023 (TATOLI)—Prezidente Komisaun E trata asuntu Infraestrutura iha Parlamentu Nasionál (PN), Deputadu Marcos Xavier, hateten tempu badak sei hala’o fiskalizasaun ba bairru sira iha Dili ne’ebé la asesu bee-moos, nune’e bele identifika problema atu rekomenda ba IX Governu hodi fó atensaun.
Notísia Relevante: BTL, E.P esforsu rezolve bee-moos iha Bekusi
“Iha emana oin, komisaun E sei halo fiskalizasaun imediatu ba iha área Dili laran haree fatin ne’ebé populasaun sira ezije bee-moos la to’o, ami sei to’o iha fatin ne’eba haree, depois rekomenda ba Governu para toma atensaun,” Prezidente Komisaun ne’e hateten ba jornalista sira iha uma fukum PN, kuarta ne’e.
Maibé, nia dehan, problema bee-moos la’ós foin iha IX Governu mak mosu maibé antes ne’e mosu ona nunka atu rezolve to’o ohin loron, nune’e mandatu Governu ida-ne’e agora fulan rua ka tolu komisaun mós bolu ona Sekretáriu Estadu Eletrisidade no Bee ho Saneamentu mai ona iha komisaun relata problema ne’ebé hasoru iha terrenu.
Problema ne’ebé iha bairru balun la hetan bee moos, tanba ida fila-fali ba populasaun sira-nia konxiénsia halo perfurasaun ilegál, nune’e apela ba populasaun hotu atu iha solusasaun mak dahuluk iha konxiénsia labele halo perfurasaun ilegál.
“Atu oferese de’it bee-moos iha Dili laran sufisiente no iha tanke rezervatóriu sufisiente, maibé agora tanbasá bee ne’e la to’o, tanba iha perfurasaun ilegál ne’ebé komunidade fura sein ba rejistu iha BTL. Ho ida-ne’e problema bee to’o agora populasaun iha bairu balun iha Dili sei enfrenta hela,” nia hateten.
Nian garante, Governu iha tempu badak sei rezolve bee-moos iha bariru balun ne’ebé hasoru problema, tanba orsamentu retifikativu aprova ona iha PN no promulga hosi Prezidente Repúblika, maibé fó tempu ba membru Governu iha área tutela hodi sira bele rekolla dadus halo normalizasaun ba bee-moos iha Dili rasik.
Deputada CNRT, Maria Gorumali Barreto, preokupa liuliu iha área Comoro iha bairru Moris Foun ne’e la asesu bee-moos iha fulan rua ikus ne’e, uluk antes BTL hadi’a kanalizasaun ne’e komunidade kuaze hetan bee maibé hafoin ne’e afeta ba uma kain hira mak to’o agora la asesu.
Prezidente Parlamentu Nasionál Interina no atuál Primeira Vise Prezidente PN, Maria Terezinha Viegas, husu Komisaun E atu tau iha ajenda atividade hala’o fiskalizasaun ba problema bee-moos iha bairru balun la asesu nune’e oinsá husu ba parte ezekutivu atu tau atensaun.
Jornalista : Nelson de Sousa
Editór : Cancio Ximenes
