iklan

NASIONÁL, EKONOMIA, HEADLINE

Konsellu Ministru altera dekretu-lei klasifikadór orsamentál

Konsellu Ministru altera dekretu-lei klasifikadór orsamentál

Dólar amerikanu. Imajen/Espesiál

DILI, 06 setembru 2023 (TATOLI)—Ministra Finansa, Santina José Rodrigues F. Viegas Cardoso aprezenta projetu dekretu Governu kona-ba alterasaun dahuluk ba dekretu Governu númeru 19/2022, loron 11 maiu, relasiona ho klasifikadór orsamentál, ne’ebé hetan ona aprovasaun iha ámbitu reuniaun Konsellu Ministru ordinária, kuarta ne’e.

Reuniaun Konsellu Ministru ne’e prezide hosi Vise Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Habitasaun Komunitáriu, Mariano Assanami Sabino.

“Objetivu alterasaun ne’e atu fasilita kompreensaun ba klasifikasaun foun hosi reseita no despeza públika, ho ninia objetivu atu agrupa kategoria sira iha grupu lima nível dahuluk nian ne’ebé korrespondente ho kategoria anteriór sira hodi transforma kategoria sira ne’ebé iha daudaun ne’e sai sub kategoria  hodi halo klasifikasaun ekonómika despeza nian sai nível haat,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.

Nune’e, aproveita hodi halo mós detallu ba sub kategoria operasaun extra-orsamentál nian no mós halo korresaun oitoan ba klasifikasaun.

Tuir dekretu Governu númeru 19/2022 11 maiu kona-ba klasifikadór orsamentár, hatudu katak enkuadramentu  Orsamentu Jerál Estadu no jestaun finanseira públika estabelese Orsamentu Jerál Estadu ne’ebé espesifika sufisientemente reseita no despeza.

Espesifikasaun  reseita no despeza  Orsamentu Jerál Estadu realiza liuhosi utilizasaun klasifikasaun orsamentál.

Klafikadór orsamentár hosi Orsamentu Jerál Estadu kompostu hosi klasifikadór orgániku, ekonómiku no funsionál.

Iha biban hanesan Konsellu Ministru aprova mós projetu dekretu-lei, ne’ebé aprezenta hosi Ministru Prezidénsia Konsellu Ministrus, Agio Pereira no Sekretária Estadu Igualdade, Elvina de Sousa Carvalho, kona-ba Orgánika Sekretaria Estadu Igualdade nian.

Sekretaria Estadu Igualdade inklui servisu lubun ne’ebé apoia Sekretária Estadu Igualdade iha ezersísiu ba ninia kompeténsia sira, liu-liu iha promosaun igualdade jéneru iha leis, polítika públika, planu estratéjiku  no operasionál, programa governamentál sira no iha Orsamentu Jerál Estadu iha sensibilizasaun públiku ba kestaun sira igualdade jéneru no inkluzaun, eliminasaun diskriminasaun no violénsia kontra feto no labarik no promosaun ba partisipasaun feto sira iha vida polítika no sosio-ekonómika nasionál.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!