DILI, 06 setembru 2023 (TATOLI)-–Primeiru-Ministru (PM), Kay Rala Xanana Gusmão hala’o enkontru ho ninia omólogu Vietname, Pham Minh Chinh, hodi deskute kooperasaun bilaterál hodi hametin liután serbisu hamutuk entre rai rua.
“Agradese ba kompromisu Governu Vientname nian hodi haruka empreza Telemor ba loke investimentu telekomunikasaun iha Timor-Leste hamutuk ho Timor Telecom no Telkomcel Indonézia hodi netraliza merkadu telekomunikasaun bele baratu no atende Estadu no sosiedade iha mundu teknolojia telekomunikasaun nian,” Xanana hateten liuhosi nota ne’ebé Agência Tatoli asesu, kuarta ne’e.
Notísia relevante : Razaun akizisaun foos Vietname: inserteza situasaun emerjénsia no demanda konsumu nasionál aas
Xefe Governu rai rua ne’e mós deskute ba futuru Vietname bele kontinua apoiu Timor-Leste hodi haboot setór agrikultura, tanba durante ne’e Vietname sempre importa foos fa’an iha merkadu Timor-Leste.
Iha enkontru bilaterál ne’e, PM Xanana Gusmão hetan akompañamentu hosi Vise Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay, Ministru Negósiu Estranjeiru Kooperasaun, Bendito dos Santos Freitas, no Ministru Interiór, Fransisco Guterres.
Jornalista : Antónia Gusmão
Editora : Julia Chatarina
