Aimoruk item sia mamuk iha Servisu Saúde Manatutu
DILI, 07 setembru 2023 (TATOLI) – Diretór Servisu Saúde Manatutu, Mateus Vicente Correia, dehan iha fulan agostu nia-laran estoke aimoruk ne’ebé mamuk iha Servisu Saúde Manatutu hamutuk item sia.
“Iha fulan agostu estoke aimoruk ne’ebé mak mamuk iha Servisu Saúde Manatutu ne’e hamuuk item sia mak hanesan ampicillin sodium injection, Benzathine injection 900mg, Benzylpenicilin injection 3g, Benzylpenicilin injection 600mg, Gentamicin sulfate, Hydrocortisone sodium succinate powder for injection ,Salbutamol oral liquid,Tetracycline 1%.5g eye,Timolol maleate 0,5%.5ml eye drops”, Mateus Vicente Correia dehan ba TATOLI via telephone, ohin.
Nia dehan, Servisu Saúde Manatutu daudaun ne’e estoke aimoruk disponivél hamutuk 145 mak atu responde ba nesesidade pasiente sira ka populasaun sira ne’ebé mak bainhira mai atu halo tratamentu saúde iha fasilidade, tantu iha sentru saúde ka postu saúde sira.
“Ami-nia estoke aimoruk ne’ebé mak disponivél, daudaun ne’e hamutuk 145 mak atu responde ba nesesidade pasiente sira ka populasaun sira ne’ebé mak bainhira mai atu halo tratamentu saúde iha fasilidade, tantu iha sentru saúde ka postu saúde sira”, nia afirma.
Nia esplika, pedidu submete ona ba nasionál maibé seidauk responde ba nesesidade ida ne’e.
Aleinde ne’e, Servisu Saúde Manatutu, iha fulan agostu, rejista mós moras sira ne’ebé mak aas hanesan Infesaun Vias Respiratóriu Aguda, diarea no moras kulit.
Jornalista : Felicidade Ximenes
Editór : Zezito Silva
