VIQUEQUE, 07 setembru 2023 (TATOLI)—Administradór postu administrativu Lacluta, munisípiu Viqueque, José dos Santos Andrade, konsidera, edukasaun sívika ne’ebé oferese hosi Komisaun Nasionál Eleisaun (CNE, sigla portugés) ne’e importante hodi hatene informasaun kona-ba eleisaun suku.
“Ha’u hanoin edukasaun sívika ne’e importante hodi konsolida no habelar informasaun komunidade, liu-liu ba xefe suku no xefe aldeia sira, inklui mós ha’u, atu ita bele kompreende oinsa lidera eleisaun komunitária iha tinan ida-ne’e. Tanba tinan ida-ne’e ami maka lidera, nune’e bainhira erru ruma mosu iha tempu eleisaun karik ami bele hatene,” Administradór hateten ba Agência Tatoli hafoin partisipa iha edukasaun sívika iha salaun Santo António Lacluta, kinta ne’e.
Nia dehan, eleisaun suku tinan ne’e diferente ho tinan seluk tanba tinan antes ne’e Governu fó kompeténsia ba Sekretariadu Tékniku Administrasaun Eleitorál (STAE) no CNE mak realiza maibé agora Governu fó kompeténsia ba autoridade sira mak lidera eleisaun.
“Orgaun CNE no STAE sira akompaña de’it prosesu eleisaun. Tanba ne’e, ha’u prefere xefe suku no xefe aldeia sira iha postu Lacluta presiza partisipa edukasaun sívika sira hanesan ne’e. Atu bainhira ita la kompreende prosesu karik bele husu direita ba órgaun eleitorál hodi esplika ba ita, atu nune’e eleisaun suku bele la’o ho di’ak,” nia akresenta.
Notísia relevante : CNE fó edukasaun sívika ba eleitór-sira iha Viqueque
Iha fatin hanesan, Xefe suku Laline, postu Lacluta, Jaquel dos Reis de Carvalho, husu órgaun eleitorál sira hodi rona preokupasaun abitante lokál ne’ebé hela dook hosi aldeia.
“Tanba eleisaun ida-ne’e eleitór sira tenke bá vota iha ida-idak ninia aldeia. Iha eleitór hamutuk 100 resin iha área Uefia, hela iha Dilór mós eleitór 100 resin, sira ne’e dook hosi aldeia. Ami hasoru problema boot maka distánsia tanba balun idade liu ona la’o labele, oinsá maka sira ezerse sira-nia direitu votu, tanba ami haree eleisaun sira ne’ebé liu ba ne’e barak maka la vota. Ho ida-ne’e ha’u husu ba órgaun kompetente sira atu haree ami-nia preokupasaun sira,” nia tenik.
Líder komunitáriu haktuir, momentu iha eleisaun parlamentár foin lalais ekipa téknika tau sentru votasaun ida iha área Uefia, maibé ba eleisaun suku ne’ebé sei akontese iha tempu badak, sentru votasaun ne’e la eziste.
“Ida-ne’e difikulta inan aman sira ne’ebé ho idade avansadu,” nia adianta.
Ho pereokupasaun ne’e, Diretór Nasionál Edukasaun Sivíka Partidu Polítiku Dokumentasaun no Informátika hosi CNE, Carlos Alves Lopes, hateten, tanba eleisaun agora ba líder komunitária, eleitór tenke vota iha ida-idak ninia sede aldeia ne’ebé sei estabelese.
“Ita hili xefe aldeia ida, maski eleitór hela dook, tenke hakbesik bá aldeia hodi ezerse direitu hili líder. Iha eleisaun suku, órgaun CNE la integra iha meza, maibé ninia kompeténsia maka atu halo supervizasaun no na’in maka autoridade lokál hamutuk ho administradór hodi akompaña tanba sira maka na’in ba eleisaun líder komunitária,” Diretór esplika.
Autoridade sira entusiazmu rona edukasaun sívika durante loron-ida, kona-ba materiál liga ba prosesu kandidatu no prosesu lidera meza asembleia suku no aldeia nian.
Atividade ne’e realiza iha postu Lacluta, ne’ebé hetan partisipasaun hosi autoridade lokál suku Dilór, Laline, Ahic, abitante lokál no estudante sira
Jornalista : Vitorino Lopes da Costa
Editora : Julia Chatarina
