DILI, 07 setembru 2023 (TATOLI) – Institutu Siénsia Relijioza (ICR, sigla portugés) nia estudante 41 ne’ebé transfere mai iha Fakuldade Edukasaun Literatura no Arte, Universidade Católica Timorese (UCT) akaba ona sira-nian estudu.
Iha serimónia graduasaun, Arsebispu Arkidioseze Metropolitana Dili, Dom Virgílio Kardeál do Carmo da Silva, husu finalista sira ne’e atu kumpre promesa hodi sai manorin ida di’ak iha sira-nian área. Tenke implementa buat ne’ebé di’ak durante estudu tinan haat nia laran.
“Ha’u atu fó hanoin katak imi simu ona misaun ida liuhusi krús no biblia. Tanba ne’e, labele bá rai tiha iha ortóriu, maibé tenke tau iha prátika nune’e imi bele sai profesór ida di’ak no iha responsabilidade atu lori labarik sira sai jerasaun foun ida ne’ebé hatene hadomi no matenek”, Dom Virgílio hameno iha serimónia graduasaun ne’ebé hala’o iha kampus UCT, Balide, ohin.
Saserdote ne’e husu ba graduandu sira atu banati tuir vida sai manorin no labele atu lakohi enfrenta dezafiu sira hodi halai bá buka serbisu iha organizasaun naun-governamentál sira.
“Iha momentu kmanek ida ne’e, liuhusi festa Natividade Virjen Santísima nian hakarak dedika imi hotu ne’ebé ohin simu graduasaun atu Na’in-Feto proteje nafatin imi-nian futuru, tulun imi hotu, akompaña imi atu sai mestre no mestra ida di’ak ba timoroan sira hotu”, dehan.
Tanba ne’e graduandu sira tenke hatudu dedikasaun di’ak ba iha vida nu’udar manorin tanba sira-nian prezensa sei fó mós apoiu ba mehi Konferénsia Episkopál Timorense nian. Tinan haat aprende iha Departamentu Profesór Relijiaun no morál, Dom Virgílio fiar katak sira sei fó tempu hodi hanorin timoroan sira kona-ba morál no relijiaun nian.
“Dalabarak ita halerik tanba violénsia, ita halerik tanba buat barak akontese. Iha ita-nian rai rasik morál no relijiaun ne’e la sai dixiplina ida obrigatória iha ezame nasionál. Entaun, halo mestre sira mós lakohi ona uza meiu seluk atu eduka estudante sira”, salienta.
Reitór UCT, Padre Joel Casimiro Pinto, hatete estudante na’in-41 ne’ebé simu ona graduasaun ne’e 31 husi Departamentu Profesór Relijiaun no Morál no sanulu husi Servisu Sosiál nian.
Graduandu Israel da Costa husi Departamentu Profesór Relijiaun no Morál haktuir katak nia hili sai manorin tanba hakarak eduka estudante sira oinsá bele hatene hadomi malu, respeita malu, liuhusi dixiplina relijiaun no morál ne’ebé maka nia aprende.
Tuir nia, ohin loron timoroan barak maka lakon sira-nian morál, liuliu jerasaun foun sira lahatene ona atu uza linguajen ne’ebé di’ak no ladi’ak tuir nia dalan. Tanba ne’e, nia hili dalan sai edukadór atu lori filafali labarik sira la’o tuir dalan ne’ebé loos.
Jornalista: Tomé Amado
Editora: Maria Auxiliadora
