DILI, 07 setembru 2023 (TATOLI) – Vise Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino, dehan Governu sei fó subsídiu ba populasaun tanba foos folin ne’ebé sae makas iha merkadu.
“Ba povu ne’e buat hotu bele de’it, fó subsídiu, halo uma ba sira no seluk tan ne’e hanesan nesesidade báziku, ita sei halo maibé sei iha prosesu diskusaun”, nia dehan.
Nia hatutan, Governu mós esforsu hela atu fó subsídiu ba populasaun sira tuir orientasaun Prezidente Repúblika ne’ebé fó sai iha semana hira ba kotuk, maibé sei iha faze diskusaun.
Antes ne’e, folin foos iha merkadu kilograma 20 ho folin $12, maibé atualmente kilograma 20 sa’e ba $17, 50 no kilograma 25 sa’e ba 20.
“Governu halo ona diskusaun hodi hatun folin foos, Governu rasik sei prepara kondisaun, agora daudaun Ministru Komérsiu Indústria (MKI) ho Ministru Agrikultura sira diskute hela, iha tempu badak ita sei iha mudansa ba foos nia folin”, Assanami dehan ba jornalista-sira iha Palásiu Governu, ohin.
Jornalista: Hortencio Sanchez
Editór : Zezito Silva
