SEI fiar iha eleisaun suku númeru feto sai xefe suku aumenta
DILI, 07 setembru 2023 (TATOLI)—Sekretária Estadu Igualidade (SEI), Elvina Sousa Caraavalho, iha espetariva no fiar númeru feto sai xefe suku iha eleisaun lidér komunitáriu ne’ebé sei akontese iha fulan-outubru tinan ne’e sei aumenta.
Nia hateten, númeru ida agora 5% feto lidera suku ne’e ki’ik tebes, tanba ne’e SEI fiar katak ho atividade SEI ho sosiedade sívil sira hala’o durante ne’e, hasa’e ona koñesementu no konsiénsia hosi públiku katak feto iha direitu atu kandidata-aan no feto mós bele atu lidera suku.
“Xefe suku 5% feto ne’ebé lidera hela sira nu’udar autoridade lokál, ne’ebé responsável tebes no ukun ho di’ak. Tanba ne’e, ho de’it sira-nia prezensa enkoraja ona feto maluk seluk atu bele sai lideransa suku no konfiansa hosi komunidade ba feto sai xefe suku sei makaas liután,” Sekretária Estadu ne’e, hateten ba Ajénsia TATOLI iha uma fukum Parlamentu Nasionál, kinta ne’e.
Nia enkoraja feto sira atu sai lideransa suku liuhosi kandidata-aan iha eleisaun suku tanba lei fó dalan atu feto mós bele compete ho mane sai lideransa suku.
SEI nia misaun iha eleisaun suku mak realiza atividade dahuluk hasa’e kapasidade feto maluk sira, enkoraja feto sira atu kandidata aan no akompaña sira-nia prosesu tomak.
“Iha atividade prinsipál seluk mak atribui ona fundu ba sosiedade sívil iha grupu feto prontu lidera no asosiasaun feto potensiál iha munisípiu hodi realiza atividade formasaun, ne’ebé ninia finalidade atu kapasita no enkoraja feto sira atu enkoraja aan,” nia dehan.
Nia parte la’ós de’it enkoraja feto atu kandidata aan maibé kandidata aan hodi bele hetan konfiansa hosi komunidade atu sai líder iha nia suku rasik, nune’e ho atividade sira hodi dudu feto sira oinsá labele iha impedimentu ruma atu kandidata aan sai lideransa suku.
Reprezenta feto partidu CNRT, Deputada Cedelízia dos Santos, hateten konstituisaun fó dalan ba feto atu bele kompete iha eleisaun sira.
“Ha’u reprezenta feto partidu enkoraja nafatin feto maluk sira, labele ta’uk ho ameasa oioin liuliu lideransa lokál sira-ne’ebé hateten kultura bandu feto kandidata aan, maibé tenke haree ba konstituisaun RDTL. Tanba, Timor-Leste ne’e nasaun demokrátiku fó direitu ba ema hotu atu kompete sai lideransa liuliu lideransa suku nian,” nia hateten.
Jornalista : Nelson de Sousa
Editór : Cancio Ximenes
