SEI husu PN inísia lei proteje traballadór doméstika atu kumpre relatóriu CEDAW
DILI, 07 setembru 2023 (TATOLI)—Sekretária Estadu Igualidade (SEI), Elvina Sousa Carvalho, husu Parlamentu Nasionál (PN) atu inísia lei ptoteje traballadór doméstika no halo revizaun ba lei violénsia doméstika hodi kumpre rekomendasaun relatóriu hosi Convention on the Elimination of All Forms of Discrimination against Women (CEDAW).
“Ohin, hato’o no aprezenta relatóriu hosi komite CEDAW ne’ebé mak hato’o ba Estadu Timor-Leste, ne’ebé iha rekomendasaun barak liña ministériu sira atu bele implementa. Ba iha PN rasik mak espesífiku atu haree liuliu lei balun liga ba traballadór doméstika, revizaun ba (lei) violénsia doméstika, inklui ho lei sira-ne’ebé mak ita hanoin iha nia implementasaun ladún favorese liuliu ba maluk feto sira,” Sekretária Estadu ne’e hateten ba jornalista sira hafoin hala’o audiénsia ho Komisaun F trata asuntu Saúde, Seguransa Sosiál no Igualidade Jéneru iha PN, kinta ne’e.
Governante ne’e hateten, liña ministériák sira no liuliu PN rasik bele kumpre rekomendasaun sira-ne’e haree ba lejislasaun sira, tanba iha tempu implementasaun balun iha nia durasaun tinan rua to’o lima.
Durante audiénsia ne’e, hetan resposta hosi komisaun F pozetivu tebes tanba komisaun konsiente mós ne’e responsabilidade hosi PN liuliu husi komisaun F ne’ebé nu’udar komisaun espesializada trata asuntu ne’ebé SEI hato’o.
Biban ne’e, SEI mós aprezenta ba komisaun F kona-ba planu asaun nasionál violénsia bazeia ba jéneru.
Jornalista : Nelson de Sousa
Editór : Cancio Ximenes
