LAUTÉM, 07 agostu 2023 (TATOLI) – Governu liuhosi Sekretaria Estadu Komunikasaun Sosiál (SeKoms) promete tau atensaun ba Rádiu Komunidade sira iha kada munisípiu liuliu fasilidade serbisu.
Sekretáriu Estadu Komunikasaun Sosiál (SeKoms), Expedito Dias Ximenes, esplika, bainhira hala’o vizita Rádiu Komunidade Lautém (RCL) ho objetivu atu hatene direita difikuldade ne’ebé rádiu ne’e enfrenta no kestaun rekursu umanu.
“SeKoms sei buka dalan atu fó atensaun ba kestaun sira-ne’ebé hasoru, liuliu ekipamentu tanba rádiu komunidade hanesan liña frente,” Sekretáriu Estadu Komunikasaun Sosiál hateten iha Lospalos, kinta ne’e.
Governu sériu atu tau atensaun ba rádiu komunidade tanba relasiona ho programa governu nian hodi implementa lei podér lokál no desentralizasaun administrativa liuliu divulgasaun informasaun kona-bá dezenvolvimentu iha kada munisípiu.
Nune’e SeKoms iha komitmentu atu hadi’a no fasilita rádiu komunidade komposta hosi ekipamentu hodi moderniza no hasa’e koñesementu iha área rekursu umanu nune’e atualiza situsasaun iha komunidade.
“Hau-nia haree rádiu komunidade Lautém presiza apoia ekipamentu, bele dehan sei sai atensaun iha orsamentu jerál tinan-2024,” Expedito Ximenes akresenta.
Governante ne’e nota rádiu komunidade sira hasoru limitasaun ekipamentu maibé jornalista sira kontinua hala’o kna’ar jurnalismu tanba profisaun refere nu’udar vokasaun.
Ermelinda Perreira nu’udar jonalista radio Komunidade Lautém, hateten, difikuldade iha Radio refere mak komputadór, recorder, meza, kadera, mixer inklui transporte ne’ebé konsidera menus hodi difikulta atividade rekolla informasaun.
“Liuhosi vizita ida-ne’e bele haree difikuldade saida mak ami hasoru no sé bele ami husu SeKoms atu tau ba planu hodi fasilita ami-nia serbisu,” Ermelinda Perreira informa.
Totál funsionáriu iha RCL hamutuk nain-neen komposta hosi jornalista na’in-lima no jestór na’in-ida
Jornalista : Natalino Belo
Editór : Evaristo Soares Martins
