VIQUEQUE, 08 setembru 2023 (TATOLI)—Abitante iha suku Uma-tolu, postu Lacluta, munisípiu Viqueque preokupa ho prosesu trata kartaun eleitorál.
“Agradese ba Komisaun Nasionál Eleisaun (CNE, sigla portugés) ne’ebé disamina informasaun iha ami-nia suku hodi hakle’an prosesu eleisaun suku. Iha oportunidade ne’e ha’u hakarak relata durante ne’e, abitante sira preokupa trata kartaun eleitóral tanba eleitór balun idade to’o ona no balun kartaun eletorál lakon, maibé sira labele trata kartaun tanba presiza dokumentu Bilhete de Identidade no sertidaun moris. Ohin Sekretariadu Tékniku Administrasaun Eleitorál (STAE) ho Rejistu Sivíl haree abitante sira-nia preokupasaun,” Xefe suku Uma-tolu, Henrique J. P Lobo Campos, hateten hafoin partisipa iha edukasaun sívika, iha suku Uma-tolu, sesta ne’e.
Notísia relevante : CNE fó edukasaun sívika ba eleitór-sira iha Viqueque
Iha eleisaun parlamentár foin lalais ne’e, eleitór hamutuk 50 resin la partisipa tanba kartaun eleitorál seidauk iha no balun kartaun lakon, enkuantu eleitór 1.000 resin iha kartaun.
“Iha eleisaun liubá, eleitór barak mak la vota tanba sira atu ba trata tenke iha Bilhete de Identidade no sertidaun moris maka foin bele, enkuantu atu trata dokumentu hirak ne’e difísil. Daudaun besik ona eleisaun suku, dalaruma sira ne’ebé seidauk iha kartaun bele la vota tan,” nia akresenta.
Iha reuniaun Konsellu Suku kestiona mós kona-ba kartaun eleitorál, ne’ebé presiza hadi’a sistema atu eleitór sira bele fasil trata kartaun eleitorál hodi partisipa eleisaun sira.
“Ha’u reprezenta Konsellu Suku Uma-tolu hakarak husu ba Governu hodi hadi’a sistema prosesu kartaun eleitorál atu eleitór sira bele halo kartaun hodi ezerse eleisaun sira tuir mai. Ami hato’o beibeik ona ba STAE, maibé sira dehan tenke tuir kritéria hanesan iha Bilhete de Identidade no sertidaun moris,” Líder komunitáriu tenik.
Iha fatin hanesan, Diretór Nasionál Edukasaun Sívika Partidu Polítiku Dokumentasaun no Informátika CNE, Carlos Alves Lopes, hateten, CNE ninia dever mak halo sosializasaun prosesu eleisaun.
“Ami mai sosializa prosesu edukasaun eleisaun suku ba tinan ida-ne’e, ne’ebé ita sei implementa bazeia lei númeru 9/2016, atu nune’e tama eleisaun iha loron 28 outubru, eleitór sira vota ho di’ak. Trata kartaun eleitorál ne’e STAE nia parte mak haree, daudaun Sekretariadu destaka ona ekipamentu iha postu nune’e eleitór sira bele partisipa iha eleisaun suku,” nia hato’o.
Atividade edukasaun sívika ne’e partisipa hosi eleitór hosi suku Uma-tolu hamutuk na’in-120 resin.
Jornalista : Vitorino Lopes da Costa
Editora : Julia Chatarina
