DILI, 08 setembru 2023 (TATOLI) – Ministru Edukasaun Superiór, Siénsia no Kultura (MESSK), José Honório Jerónimo, husu ba instituisaun ensinu superiór públiku no privadu sira bainhira atu loke kursu foun tenke kumpre Dekretu-lei N.o 26/2017, 26 jullu, kona-ba rejime avaliasaun no akreditasaun instituisaun ensinu superiór no siklu estudu.
“Husu ba ensinu superiór públiku no privadu sira seluk bainhira hakarak loke kursu foun karik tenke lee didi’ak Dekretu-lei númeru 26/2017, 26 jullu. Ha’u lakohi halo hanesan ensinu superiór balun depois loke tiha kursu foun mak foin informa ba ministériu. Depois sira-nian karta hakerek tan ho lian inglés”, José Honório hatete iha serimónia graduasaun UNDIL nian ne’ebé hala’o iha salaun CNE, Caicoli, ohin.
Ezijénsia husi MESSK husu ba universidade sira atu labele kontra regra no rekizitu sira, tanba atu garante kursu sira ne’ebé eziste tenke iha duni kondisaun. Labele hanoin loke de’it no ikus mai mosu desizaun ruma husi Governu entaun estudante sira mak sai vítima. Tanba ne’e, presiza iha kolaborasaun di’ak ba malu atu iha futuru labele mosu problema.
Nia dehan ensinu superiór sira mós labele haluha artigu 13 iha Konstituisaun ne’ebé konsagra ona katak lian ofisial iha rua de’it maka tetun no portugés. Bainhira atu halo relatóriu ruma ba ministériu tenke ho lian ofisiál.
MESSK mós simu ona rezultadu avaliasaun ne’ebé Ajénsia Nasionál Avaliasaun no Akreditasaun Akadémika (ANAAA) halo ba ensinu superiór 51 no husi kursu sira ne’ebé eziste iha de’it ida maka hetan valór A maka kursu Enjeñaria Sivíl husi Universidade Nasional Timor Lorosa’e (UNTL).
Husi rezultadu ida ne’e hatudu katak kursu sira ne’ebé maka hetan avaliasaun iha 22% maka kategoria nivel B no 73% nivel C. Tanba ne’e, MESSK kria ona Komisaun Organizadora Universidade ba Institutu Privadu no Públiku (COUIPP, sigla portugés) ne’ebé sei hala’o nia serbisu durante tinan lima nia laran no hakarak hadi’a duni kualidade edukasaun iha Timor-Leste.
Reitór UNDIL, José Agostinho Belo, konsidera katak preokupasaun Governu nian kona-ba kualidade iha universidade sira ne’e pertinente duni, nune’e bele fanu instituisaun sira bele tau atensaun hodi garante kualidade edukasaun.
“Ita nasaun demokrátika. Estadu no Governu nee ita-nian. Kada instituisaun ka universidade ne’ebé hanoin atu loke kursu ruma tenke kumpre no obedese ba regra no lei sira ne’ebé mak vigora ona”, dehan.
Tuir nia, UNDIL molok atu loke kursu ida sempre halo estudu viabilidade no aprezenta uluk prosesu ba MESSK no bainhira hetan ona apresiasaun no autorizasaun inklui despaxu ruma maka foin bele loke kursu sira ne’e.
Jornalista: Tomé Amado
Editora: Maria Auxiliadora
