DILI, 10 setembru 2023 (TATOLI)- Governu Timor-Leste no Governu Repúblika Provínsia Hunan-Xina reafirma akordu kooperasaun ne’ebé antes ne’e rai rua estabelese ona iha setór prioridade lima.
Primeiru-Ministru, Kay Rala Xanana Gusmão informa asuntu ne’e, hafoin enkontru ho Governadór Provínsia Hunan Xina, Mao Weiming hodi deskute formatu kooperasaun ne’ebé uluk estabelese ona entre rai rua iha tinan 2014 to’o 2017.
Governu Provínsia Hunan Xina hakarak fortifika ekonomia Timor-Leste liu hosi hasa’e produsaun setór agrikultura, peska, pekuária, Veteranaria no Hortikultura.
“Uluk ha’u ba Hunan-Xina iha 2014 no 2017 maka asina tiha akordu entre Hunan no Manatuto, iha setór agrikultura no iha hasoru malu dadaun ami ko’alia ba kontinuasaun programa ne’e,” Xanana esplika hafoin ramata enkontru ho Governadór Mao Weiming, iha Palásiu Governu, domingu ne’e.
Xefe Governu konsidera programa hirak ne’e importante ba tinan lima governasaun hodi apoia povu agrikultura hodi hasa’e dezenvolvimentu produsaun agrikultura iha Timor-Leste.
Biban hanesan, Governadór Mao Weiming agradese bele introdús direta programa ba Xefe Governu no ninia membru governu, inklui populasaun Manatuto, hodi kria kooperasaun ne’ebé di’ak liután iha setór agrikultura nian.
“Ami agradese tebes bele mai introdús programa ne’ebé ami sei estabelese tan entre Hunan no Governu Timor-Leste,” Governadór salienta.
Governador Provínsia Hunan-China, Mao Weiming hamutuk ho Ministru Administrasaun Estatál, Tomás do Rosário Cabral rasik hala’o ona vizita servisu ba Munisípiu Manatuto hodi lansa ona programa kooperasaun ne’e.
Enkontru ne’e, PM Xanana hetan akompañamentu hosi Vise Primeiru-Ministru, Asuntu Ekónomiku, no Ministru Turizmu no Ambiente, Francisco Kalbudia Lay, Ministru Administrasaun Estatál, Tomás do Rosário Cabral, Ministru Agrikultura, Pekuária, Peska no Floresta, Marcos da Cruz.
Jornalista : Antónia Gusmão
Editór : Florencio Miranda Ximenes
