DILI, 10 setembru 2023 (TATOLI)– Primeiru-Ministru, Kay Rala Xanana Gusmão, hala’o vizita bá ró Militár Ospitál Xina “Peace Ark 866”, ne’ebé hala’o vizita mai Timor-Leste hodi fó asistensia umana liuliu saúde gratuitu ba povu Timor-Leste.
PM Xanana agradese ekipa médiku tomak nia domin durante semana ida fó asisténsia saúde gratuita ba populasaun sira ne’ebé sofre moras oin-oin bele vizita no hala’o tratamentu direta.
“Ha’u agradese tebes ba imi-nia atendimentu sira ba ami nia povu, ida mak asaun umanu ne’ebé imi hala’o la’ós mai Timor-Leste, karik bele ba mós rai sira iha Áfrika ne’ebá sira moris mukit liu presiza tebes asisténsia umana sira hanesan ne’e,”
PM Xanana hato’o agradesementu ne’e bainhira konversa ho Almirante Zhao Guangqin no Almirante Li Xike ne’ebé introdus mapa mundu nian ne’ebé ekipa ba vizita ona, iha ró laran, Portu Dili, domingu ne’e.
Ró Ospitál Naval China Peace Ark 866 nu’udar ró militár Xina nian dahuluk ne’ebé hala’o misaun umanu iha mundu ho nia naruk kuaze metru 45 ho kapasidade tonelada 10.000.
Biban ne’e, Komandante Ró Ospitál Xina -Peace Ark, Almirante Zhao Guangqin introdús ba Xefe Governu Xanana katak, ró ne’e hala’o ninia operasaun dahuluk ba atendimentu umanu ka fó asisténsia saúde gratuita hahú tinan 2008 no dadaun ne’e hala’o ona vizita ba nasaun 43 no Timor-Leste hetan vizita dahuluk iha tinan 2017 no tinan 2023.
Hosi nasaun 43 ne’ebé sira vizita kuaze fó ona asisténsia médiku ba pasiente kuaze rihun 250 no halo ona operasaun ba pasiente sira ne’ebé moras kuaze 1.500.
Durante vizita Timor-Leste, tuir dadus Ministériu Saúde populasaun ka pasiente sira ne’ebé hetan asisténsia saúde kuaze rihun 10 liu.
Tuir planu ró refere, domingu (10/09) sai hosi Timor-Leste sei fila fali ba Xina no atraka iha ninia fatin permanente Portu Mariña Militár Provínsia Zhenjiang.
Vizita Xefe Governu ba ró Ospitál Xina-Peace Ark 866 ne’ebé sandar iha Portu Dili, akompaña hosi Vice Primeiru Ministru no Ministru Koordenadór Ekonómiku no Ministru Turizmu no Ambiente, Francisco Kalbudia Lay, Ministra Saúde, Élia Amaral no simu hosi Komandante ró Ospitál Xina-Peace Ark 866, Almirante Zhao Guangqin no Almirante Li Xike no ofisiál ho parede militár.
Jornalista : Antónia Gusmão
Editór : Florencio Miranda Ximenes
