VIQUEQUE, 11 setembru 2023 (TATOLI)-Sekretariu Estadu Asuntu Kombatente Libertasaun Nasionál, (SEACLN,sigla portugués), Cesar dos Santos da Silva Merac, informa, Governu Konstitusionál dasiak planea sei haloot restu mortál iha munisípiu Viqueque, Ainaro no Ermera iha tinan 2024.
“Kona-ba restu mortál ami planea ona tanba orsamentu retifikativu ne’ebé agora iha labele kobre ba serimónia haloot restu mortál inklui serimónia funebre. Maibé, tinan 2024 ami sei haloot restu mortál sira-ne’ebé rai iha osoáriu sira,” Governante ne’e hateten ba Agência Tatoli, iha Buanurak, foinlalais ne’e.
Notísia Relevante :Governu haloot ona restu mortál 2.000-resin iha territóriu nasionál
Sekretáriu Estadu ne’e, dehan hosi parte munisípiu Viqueque nian, restu mortá balun família saudosu sira kria ona jardím erói iha Abana Nahareka Ossu, maibé Governu hanoin katak persiza konstrui jardím erói iha postu administrativu Ossu.
No jardím erói Uatulari, nia esplika daudaun ne’e, sei kontinua iha prosesu konstrusaun no espera bele finaliza iha tempu badak hodi haloot restu mortál sira iha postu administrativu Uatulari nian.
Iha fatin seluk Sekretariu Ezekutivu Konsellu Veteranu Munisípiu Viqueque, Daniel Sarmento Soares “Fogeti”, husu atu aselera prosesu konstrusaun ne’e, atu nune’e bele haloot ona restu mortál sira ne’ebé tinan barak ona rekoilla hodi tau de’it iha osoáriu sira.
“Ha’u husu ba Governu aselera ona haloot restu mortál ne’ebé seidauk haloot tanba kle’ur ona rai de’it iha osoáriu ne’e ha’u sente ladun di’ak ita presiza haloot ona,” nia preokupa.
Tuir dadús totál restu mortál iha munisípiu Viqueque ne’ebé rai iha Osoáriu Crarãs hamutuk na’in-49, Osoáriu postu Uatulari 400, Osoáriu Uefia Lacluta hamutuk 150, Buburlaran Viqueque-Villa hamutuk 19 no Osoáriu Abana Nahareka postu administrativu Ossu hamutuk 30.
Entretantu, oras ne’e, jardím erói Uatulari no Viqueque Villa iha hela prosesu konstrusaun, maibe, parte Ossu Konsellu Veteranu identifika ona fatin iha Uka-oan no Abana Nahareka, postu Lacluta sei hari’i iha área Uefia no postu Uatucarbau sei iha prosesu identifikasaun fatin.
Notísia Relevante :MAKLN sei haloot restu mortál 3.740-resin iha 2023
Jornalista: Vitorino Lopes da Costa
Editóra : Agapito dos Santos
