DILI, 11 setembru 2023 (TATOLI) – Sala aula la sufisiente, falta mobiliáriu eskolár no laiha bee difikulta tebes Eskola Bázika Filiál (EBF) 1.o no 2.o siklu Kuluhun halo prosesu aprendizajen ho di’ak.
Estabelesimentu eskolár ne’ebé ho nia alunu hamutuk 804 ne’e mós sofre ba halaok ema nian ne’ebé so’e fo’er arbiru iha resintu eskola nian, tanba EBF ne’e laiha muru protesaun hodi bele asegura sira-nian ambiente moos.
Estudante sira iha dadeer, antes prosesu aprendizajen, tenke fase no hamoos ema nian fo’er ne’ebé soe latuir nia fatin. Bainhira bee laiha, alunu sira tenke buka hodi bele fase fo’er ne’ebé ema husik hela iha sala laran.
“EBF Kuluhun to’o agora seidauk iha kondisaun seguru atu garante prosesu aprendizajen ba estudante sira, tanba janela, odamatan inklui muru mós laiha, nune’e difikulta labarik sira atu simu dixiplina ho di’ak”, koordenadora eskola, Benvinda Agostinha Freitas, hatete ba Tatoli.
Tanba estudante sira sai fali vítima ba ema seluk nia hahalok maka eskola ne’e husu ona Ministériu Edukasaun atu toma konsiderasaun hodi bele rezolve kestaun ne’e ho lalais.
“Ami haruka ona pedidu ba Ministériu Edukasaun atu trata asuntu ne’e, maibé to’o agora seidauk hetan desizaun ruma”, nia dehan.
Dirijente ne’e esplika mós katak eskola ne’e laiha sala sufisiente, nune’e sala ba manorin sira uza hotu ba prosesu aprendizajen. Maski EBF ne’e iha sala 21 maibé lato’o ba ensinu aprendizajen nune’e fahe turnu ba alunu sira eskola iha dadeer no lorokraik, maibé husi númeru sala aula ne’e iha neen mak laiha ona kondisaun.
Alunu EBF Kuluhun Jenícia Amaral Ximenes husu ba Ministériu Edukasaun atu tau atensaun ida séria tebes hodi hadi’a eskola ne’e, tanba daudaun laiha seguransa.
Nia la kontente ho atitude ema seluk nian ne’ebé so’e fo’er arbiru iha sala laran. Nune’e, nia husu atu hadi’a lalais eskola ne’e atu sira bele estuda iha ambiente ne’ebé di’ak no saudavel nia laran.
“Ami loron-loron tenke mai hamoos komunidade nia sintina iha ami-nia aula laran, tanba ne’e ami husu ba Governu tenke mai hadi’a lalais eskola ne’e atu ami bele estuda iha fatin ida di’ak”, dehan.
Eskola ne’e iha profesór hamutuk 37 – permanente 21 no kontratadu 16 . Husi profesór kontratadu ne’e hitu mak hanorin Programa Eskola iha Uma.
Jornalista: Tomé Amado
Editora: Maria Auxiliadora
