OÉ-CUSSE 11 setembru 2023 (TATOLI – Fomrnadu sira hamutuk na’in-86 ne’ebé durante ne’e tuir kursu profisionál iha Sentru Formasaun Bansone, Rejiaun Administrativa Espesiál Oé-Cusse Ambeno (RAEOA), sei gradua iha fulan-outubru 2023 ne’e.
Diretór SEFOPE Sentru Formasaun Bansone, António Boquifai, hateten, matéria ne’ebé formandu sira aprende, iha programa tolu fahe ba unidade hitu, primeiru kona-bá konstrusaun jerál, iha unidade lima, hanesan karpintária, eletrisidade, soldadura, albenária no kanalizasaun, programa daruak, kona-bá ospitalidade no agrikultura.
Nune’e mós iha kursu lian Korea, realiza kada semana ida dala tolu fasilita hosi profesora ida mai hosi nasaun Korea ho kontratu permanente.
“Iha tinan ne’e ita iha formandu hamutuk ema na’in-86, mak partisipa iha kursu profisionál ne’e rasik, hahú hosi nivél I no nivél II iha na’in-40, kursu ne’e sira sei gradua iha fulan-outubru 2023 ne’e tanba hahú kursu iha kedas janeiru 2023,” António Boquifai ba jornalista sira iha Oé-Cusse, segunda ne’e.
Nia informa, durante ne’e Sentru formasaun Bansone, hahú iha 2018 to’o agora gradua ona formandu hamutuk na’in-100 liu, maioria hetan ona kampu trabllu tantu iha setór privadu no Governu, balu kria rasik kampu traballu iha uma, hanesan soldadura no karpinteiru.
“Durante ne’e ita mós servisu hamutuk ho Sentru Formasaun Tibar, kona-bá formandu sira hosi Oé-Cusse, bele tuir kursu iha Tibar, nune’e joven sira-ne’e durante hetan ona formasaun hosi Tibar no fatin seluk bele sai manorin fali iha Sentru Formasaun Bansone,” nia katak.
Tán ne’e iha sesta semana kotuk, Governu liuhosi SEFOPE hala’o vizita, hodi observa direita kona-bá kondisaun no fasilidade sira-ne’ebé iha sentru formasaun.
“Iha vizita ne’e, ita mós hato’o rekomendasaun no proposta, atu oinsá bele apoia tán ita kona-bá fasilidade, nune’e bele aumenta iha sentru fomasaun, durante ne’e sufisiénte, tanba ne’e Governu mak harii, atu fasilita joven sira hodi hasa’e abilidade no hetan kapasitasaun,” nia katak.
Notísia relevante: SEFOPE RAEOA suspende nafatin formasaun iha Sentru Bansone
Jornalista : Abílio Elo Nini
Editór : Evaristo Soares Martins
