Movimentu Estudante no Juventude husu Komandu F-FDTL foti medida ba oknum PM tiru karau
DILI, 13 setembru 2023 (TATOLI) – Movimentu Estudante no Juventude Manufahi husu ba Komandu Fatilitl-Forsa Defeza Timor-Leste (F-FDTL) atu foti medida hasoru oknum Polísia Militár ne’ebé mak uza kilat hodi oho komunidade nia karau iha aldeia Selihasan, Postu Administrativu Same, Munisípiu Manufahi foin lalais ne’e.
Kazu ne’e akontese iha loron (10/9) sábadu tuku 04:20 magrugada, deskonfia iha oknum Polísia Militár uza kilat hodi tiru komunidade nia karau iha fatin ne’ebá, nune’e komunidade sira iha fatin refere hetan no halo virál kedan iha rede facebook.
Ho atus oknum PNTL ne’e, komunidade sira hato’o kedan keixa ba autoridade seguransa Manufahi.
Tanba ne’e movimentu estadante husu ba Komandu F-FDTL atu foti medida hasoru oknum PM ne’ebé uza arma hodi tiru komunidade nian karau.
“Ami husu ba Komandu F-FDTL atu foti medida hasoru oknum Polísia Militár ida ne’ebé uza arma povu nian hodi ba oho povu nian animál”, porta-vós Movimentu Estudante Manufahi Oan António Rebelo Mendes, hateten ba jornalista sira liuhosi konferénsia imprensa ne’ebé hala’o iha iha CNJTL, Farol, kuarta ne’e.
“Husu ba Ministru Defeza atu halo atuasaun rigór ba oknum ida ne’ebé utiliza arma hodi oho animál povu sira nian”, nia adianta.
Nia mós husu ba Prezidente Repúblika hanesan mós komandante supremu atu bolu atensaun ba autoridade mililtar sira ne’ebé uza arma povu nian hodi ba oho povu sira-nia animál.
Husu mós ba Parlamentu Nasionál liuhosi Komisaun B atu halo fiskalizasaun ba erru ne’ebé akontese iha Munisípiu Manufahi ne’ebé uza kartus povu nian hodi oho povu nia animál ne’ebé uza povu nia osan rasik sosa.
Nune’e mós husu ba Prevedoria Direitus Humanus Justisa (PDHJ) atu halo investigasaun profunda ba kazu ne’ebé oknum PM ne’ebé uzaarma hodi oho komunidade sira-nian animál iha no rezuldu investigasaun tenke publika iha públiku.
Husu ba Prezidente Konsellu Vertanus Timor-Leste atu bolu mós atensaun ba veteranu ne’ebé sai hanesan matadalan hodi la’o hamutuk ho oknum PM ne’e hodi oho povu nia animál.
Porta-vós ne’e mós husu ba Ministériu Agrikultura liuhosi Sekretáriu Estadu Floresta atu kondena oknum ne’ebé utiliza arma povu nian hodi oho animál tuir lei ne’ebé vigora ona iha ministériu relevante.
“Hanesan estudante, ami husu ba instituisaun hirak ne’ebé mensiona iha leten, atu foti medida imediatu ho rigór hasoru kualker oknum sira ne’ebé uza arma povu nian hodi ba kasa ilegál iha”, nia hateten.
Jornalista: Natalino Costa
Editór : Zezito Silva
