PR Horta husu Governu kontrolu másimu Fronteira Motain
LIQUIÇA, 11 setembru 2023 (TATOLI) – Prezidente Repúblika husu ba Governu tenke kontrola ho másimu ba sasan ne’ebé kada loron tama sai iha fronteira Motain.
“Governu tenke kontrola ho másimu iha fronteira Motain atu Portu Tibar ho Motain tenke la’o hanesan, atu nune’e fronteira Motain labele fó fali impaktu negativu ba ita-nia komérsiu internu”, Xefe Estadu dehan ba jornalista-sira iha Lortu Tibar, segunda ne’e.
Prezidente Repúblika husu mós ba Governu atu kria lei hodi kontrola atu labele fó impaktu ba investimentu ne’ebé boot, hanesan Portu Tibar.
Horta hato’o liafuan hirak ne’e bazeia ba tasa iha Portu Tibar ne’ebé selu makas no empreza balun hatama sira-nia kontentór hosi Portu Atapupu Indonézia hafoin hatama hosi fronteira Motain ho tasa ne’ebé kiik no fó impaktu negativu ba Timor-Leste.
“Ita kompriende komersiante, importadór ne’ebé buka lukru, ida ne’e normál, karga ne’ebé mai hosi Surabaya mai iha Atapupu tama hosi fronteira laiha lei ruma atu proteje, tanba kontentór sira tama la selu tasa ne’ebé korespondente ba ita-nia Estadu, ita mak lakon”, Horta dehan.
Aleinde ne’e, Governu tau ona orsamentu ne’ebé boot hodi hadia estrada hosi Motain to’o Dili, maibé kontentór no kareta boot sira halai hosi Motain halo estrada sira aat, maibé selu tasa ne’ebé kiik tebes halo lakon Estadu.
“Kareta boot sira tama hosi fronteira mai estraga hotu dalan sira, sira la selu tasa, sira hamate marjen lukru Estadu nian, ne’e duni Governu tenke haree ida ne’e, tanba sira hatama hosi Surabaya mai iha Atapupu depois mai Timor-Leste hetan lukru ne’ebé boot tebes, Governu tenke haree, ita iha Portu ida ne’e para uza hatama kontentór, la’os hatama fali hosi estrada”, nia hateten.
Ho preokupasaun ne’e, Ministru Transporte no Telekomunikasaun (MTK) Miguel Manetelu hateten, kona-ba atu kontrolu tasa iha fronteira iha hela prosesu no Governu seidauk halo lei maibé sei avansa uluk ho diploma ministeriál hodi regula.
“Ita avansa ho lei ne’e prosesu naruk, entaun ami avansa uluk ho diploma ministeriál balun, atu regulariza kestaun ne’ebé mak Prezidente Repúblika preokupa”, Miguel prefere.
Governu garante, iha fulan outubru bele aplika ona diploma ministeriál hodi regulariza sasan ne’ebé hatama hosi fronteira hodi labele diferente ho tasa ne’ebé iha Portu Tibar tanba durante ne’e tasa iha fronteira presu kiik kompara ho Portu Tibar.
Nia dehan, diploma ministeriál ne’e mós sei aplika tasa ba kareta ne’ebé tula sasan barak atu selu kustu ne’ebé boot tanba tula sasan ho kapasidade boot estraga estrada ne’ebé iha.
Enkuantu, presu ba tasa tonelajen nian sei iha prosesu nia laran, bainhira diploma ministeriál ne’e sai ona mak foin define presu ba tasa tonelajen.
Jornalista: Hortencio Sanchez
Editór : Zezito Silva
