Xefe Estadu observa funsionamentu Portu Tibar
LIQUIÇA, 11 setembru 2023 (TATOLI) – Xefe Estadu José Ramos Horta observa direta ba funsionamentu servisu Portu Tibar ne’ebé la’o hela.
“Ha’u hakarak mai iha ne’e hodi observa funsionamentu servisu Portu Tibar nian, haree buat hotu la’o di’ak, ha’u kontente tebes, tanba Portu ne’e hahú iha prosesu sira iha 2014 no remata konstrusaun hotu iha 2021, maibé agora kapas tebes, ne’e orgullu mai ita”, Prezidente Repúblika José Ramos Horta dehan ba jornalista-sira iha Portu Tibar, segunda ne’e.
Nia dehan, Portu Tibar parte importante ida ne’ebé kontribui másimu ba Timor-Leste nia ekonomia no nia adezaun ba ASEAN.
“ASEAN ezije ita kona-ba dezenvolvimentu enfraestrutura maibé iha Timor-Leste só Portu ne’e mak boot liu ona, ne’e parte kontribuisaun ida ba ita-nia adezaun ba ASEAN”, nia revela.
Nia hatutan, tuir dadus ne’ebé aprezenta hosi kompaña Bolore no alfándega hatudu katak funsionamentu di’ak tebes.
Iha fatin hanesan, Diretór Jerál Autoridade Alfándega José Abilio informa, hahú fulan janeiru to’o agostu tinan ida ne’e, Portu Tibar liuhosi Alfándega hatama ona reseita hamutuk millaun $60.1.
“Osan sira ne’e mai hosi tasa ne’ebé ita rekolla hosi tasa importasaun, tasa seletivu, sobre venda no seluk tan”, José Abilio friza.
Tuir dadus ne’ebé Alfándega iha, kontentór tama iha Portu Tibar hosi nasaun sira hanesan, Indonézia, Austrália, Vietname no seluk tan, tuir oráriu no kada ró ida bele tulu kontentór hamutuk 400 to’o 500.
“Daudaun ne’e ita aplika ona tasa 2,5% bainhira Orsamentu Retifikativu aprova iha 29 agostu iha 03 setembru ami aplika ona tasa 2,5%, la aplika tasa ida uluk ona ida 5% ne’e, ne’ebé sasan sira folin fila hikas ba normál hanesan uluk”, nia afirma.
Hosi aplikasaun lei ne’e, tasa seletivu hanesan masin-midar fila hikas ba zero, tabaku uluk selu tasa rihun $100 agora tun fali ba rihun $50.
Jornalista: Hortencio Sanchez
Editór : Zezito Silva
