VIQUEQUE, 12 setembru 2023 (TATOLI)-Asosiasaun Mane ho Vizaun Foun (AMHVF), estabelese ona grupu protesaun suku atu oinsá halo prevensaun ba labarik sira hosi violénsia no aktu krime sira seluk, iha suku 12 iha postu administrativu Uatulari, munisípiu Viqueque.
Diretór Ezekutivu AHHVF, Americo de Araújo, hateten objetivu hosi estabelesimentu grupu ne’e atu lori informasaun ba komunidade liga ho servisu justisa no asuntu igualidade jeneru, protesaun labarik no direitu labarik hodi haforsa ekonómia familia nune’e bele moris iha ambiente ármonia no paz.
“Ohin estabelese ona grupo protesaun suku ba servisu hamutuk ho liña ministeriál sira hotu no issue seluk hodi prevene no proteje komunidade sira husi risku oioin no relata isu ba administrasaun postu administrativu Uatulari, Uatu-carbau no munisípiu, nomós servisu iha área advokasia ba direitu umanu, direitu labarik ne’ebé lidera direita husi Komisaun Nasional Diretu Labarik (KNDL ka INDDICA),”nia hateten ba jornalista sira hafoin lansa grupu protesaun suku, iha suku Vessoru, postu Uatulari, tersa ne’e.
Grupu potesaun suku ne’e iha ho ninia estrutura atu relata no rejistu kazu sira bazeia ba jeneru, kazu violensia doméstika ne’ebé fó risku ba feto no labarik sira, tanba ne’e suku Vessoru sai modelu ba suku 11 iha postu administrativu Uatulari ne’ebé deklara zero ba violénsia doméstika.
“Ami rona mensajen pozitivu sira husi grupu protesaun suku Vessoru liuliu mane sira katak prontu atu kombate violénsira hasoru feto no labarik sira. Ita estabelese grupu protesaun suku ne’e no ami kontinua akompaña grupu sira hodi kombate violénsia,” nia promete.
Iha fatin hanesan Adiministradór Postu Uatu-carbau, Alfredo dos Santos, agradese ba AMHVF ninia esforsu tanba hakarak tulun autoridade lokal, lideransa komunitária no seguransa sira hodi prevene no redúz númeru violénsia iha fatin ne’ebá.
“Ha’u fó agradese ba ekipa AMHVF ninia esforsu tomak hakarak kombate violénsia iha ita postu rua ne’e, tan ne’e ha’u husu ba autoridade suku sira hodi kolabora ho sira atu redús númeru violénsia no ita haklaken nafatin ba ita-nia abitante sira hodi sira bele la’o tuir,” nia hateten.
Nune’e mós Komandante Eskuadra PNTL Uatulari, Segundu Sarjentu Polísia, Celestino Caldas, relata númeru kazu violénsia doméstika nafatin rejistu maka’as iha postu administrativu Uatulari.
“Iha postu Uatulari ami rejistu beibeik kazu violensia domestika hanesan fen no laen baku malu iha tinan ida-ne’e, tan ne’e liu husi estabelesimentu grupu protesaun suku ne’e bele muda ema-nia mentalidade atu bele redús violénsia iha suku,” nia subliña.
Nia relata hosi kazu violénsia doméstika ne’ebé akontese iha Uatulari rezulta ema na’in-7 tama ona prizaun Becora no na’in tolu mak mate ona iha prizaun.
“Ita fó hanoin malu la’os atu halakon violénsia, maibé ita redús kazu violénsia tanba ne’e ekipa AMHVF mai soializa hodi redúa risku violensia sira,” nia hateten.
Tuir dadús husi fulan janeiru to’o agustu 2023 kazu krime ne’ebé rejista iha eskuadra PNTL Uatu-carbau hanesan violénsia domestiku iha kazu 8 no kazu seluk 29. Enkuantu eskuadra PNTL Uatulari rejistu kazu violénsia doméstika hamutuk 12.
Iha serimónia lansamentu ne’e, grupu protesaun suku AMHVF hari’i ona kuadru avizu iha sede suku Vessoru, no distribui livru kona-ba matadalan ba grupu protesaun suku, matadalan atu rejistu kazu ne’ebé akontese iha suku no distribui panfletu ho ninia mensajen pozitivu ba populasaun sira, autoridade suku no no PNTL.
Programa AMHVF ne’e hetan apoia husi Sekretáriu Estadu Igualidade (SEI), no AJAR maka implementa programa sira relevante liga ho protesaun no prevensaun violénsia bazeia ba jenéru iha Postu Uatulari no Uatucarbau.
Jornalista: Vitorino Lopes da Costa
Editór : Agapito dos Santos
