CNE Oé-Cusse teste kandidatu ofisiál 142 prepara ba eleisaun suku
OÉ-CUSSE, 12 setembru 2023 (TATOLI – Komisaun Nasionál Eleisaun (CNE, sigla portugés), tersa ne’e hala’o teste eskrita ba kandidatu ofisiál hamutuk na’in-142 hodi destaka iha suku no aldeia atu halo supervizaun ba eleisaun suku.
Notísia relevante: CNE abertura edukasaun sívika iha Pássabe prepara ba eleisaun suku
Diretór CNE Oé-Cusse, Tomas Oqui Meta, hateten, bainhira kandidatu pasa iha teste eskrita ne’e sei kontinua ba teste orál.
“Ohin sira hamutuk 142, hahú teste eskrita, sé mak pasa sei tuir tán teste orál, hafoin mak haree fila-fali sira-nia valór, liu ka lae,” Tomas Oqui Meta, ba Tatoli iha eskritóriu CNE Oé-Cusse.
Nia informa, rekrutamentu ne’e bazea ba valór teste nian, maske balu antes ne’e hetan ona esperiénsia servisu hanesan ofisiál supervizaun iha eleisaun antes, maibé bainhira teste maka valór la to’o, bele la pasa.
Tanba iha ezame eskrita ne’e, parte CNE prepara matéria sira fokuliu kona-bá kna’ar CNE nian, nune’e bainhira tún iha terrenu fasil ba sira atu komprende no servisu hamutuk ho entidade sira hotu.
“Rezultadu ikus hodi kandidatu 142 ne’e, ita sei presiza na’in-63 atu destaka iha suku 18 no aldeia 62 iha terrtóriu Oé-Cusse,” nia katak.
Notísia relevante: MAE-STAE preparadu fasilita eleisaun ba Xefe Suku
Jornalista : Abílio Elo Nini
Editór : Evaristo Soares Martins
