iklan

EDUKASAUN, HEADLINE

Lúcia Corte-Real, husi limpeza ba sekretaria iha Notariadu

Lúcia Corte-Real, husi limpeza ba sekretaria iha Notariadu

Lúcia Corte-Real

DILI, 12 setembru 2023 (TATOLI) – Mai ho knaar hanesan funsionária limpeza, iha 2006, iha Diresaun Rejistu Notariadu Pasaporte nian, Lúcia Corte-Real (51), ohin, sai ona sekretária iha diresaun ne’e tanba grasa husi Programa Alfabetizasaun iha Sentru Komunitária Aprendizajen (SKA) Becora.

Lahatene hakerek no lee la’ós sai sasuka ba inan ho oan na’in-ida ne’e atu aprende hodi bele hetan oportunide ida hanesan agora. Mai ho hanoin ida hakarak sai funsionária hanesan maluk sira seluk, tanba ba nia edukasaun sei la taka dalan ba ema atu aprende mezmu nia mai ho frakeza oioin. “Importante mak bainhira sei iha vontade atu aprende, sempre iha oportunidade”, dehan.

Ho pensamentu ida ne’e, hafoin serbisu durante tinan rua, iha 2008, Lúcia husu autorizasaun ba nia superiór hodi partisipa iha formasaun fulan sia ne’ebé muda nia jornada husi limpeza ba sekretaria iha Notariadu.

La komprende di’ak kona-ba alfabetizasaun maibé rona de’it katak sentru ne’e loke formasaun ba ema la hatene lee no hakerek halo Lúcia mós hola parte iha programa ne’e.

Ho falta koñesimentu ne’ebé iha, Lúcia husu tulun ba estudante oan sira ne’ebé hela hamutuk ho nia iha uma Becora atu hanorin nia lee no hakerek. Loroloron labarik sira haruka nia memoriza letra ki’ik no boot hanesan forma ida atu dekór alfabetu ho fasilmente.

“Ha’u la moe ho ha’u nia difikuldade ne’ebé iha. Ha’u husu labarik sira iha uma hanorin ha’u tanba ha’u fiar katak loron ida ha’u bele sai ema ida ne’ebé hatene lee no hakerek. Husi bukae uitoan ne’ebé ha’u hetan iha uma, ha’u kontinua tuir formasaun iha Sentru Komunitária Aprendizajen no ikus mai lori ha’u sai ema ida bele enkaixa aan iha Ministériu Justisa”, nia konta.

Ba nia, Programa Alfabetizasaun ne’ebé Governu halo ba ema sira la hatene lee no hakerek ne’e oportunidade hodi aprende mezmu sira iha ona idade avansada. “Bainhira iha hakarak atu aprende bele hetan oportunidade, maski balun de’it mak susesu”, nia reitera.

Liuhusi Programa Alfabetizasaun, Lúcia Corte-Real agradese tanba bele hetan fatin hodi asume knaar nu’udar sekretária.  “Ohin loron ha’u bele serbisu hodi hetan fatin ida di’ak iha Ministériu Justisa ne’e tanba ha’u-ninia esforsu durante fulan sia nia laran hodi aprende husi frakeza ne’ebé ha’u iha no konsege hatudu rezultadu ne’ebé di’ak”, nia orgullu.

Lúcia Corte-Real oras ne’e sai ona funsionáriu permanente ho remunerasaun mensál $195. Nia karreira hahú husi 2006-2011 hanesan funsionária limpeza no dentru tinan ne’e sai permanente iha Ministériu Justisa. Husi 2011-2019, sai nu’udar resepsionista iha diresaun ne’e. Husi serbisu sira ne’e hotu, iha 2019, nia asume fali knaar hanesan sekretária to’o ohin loron.

Husi kursu fulan sia no sai funsionáriu iha Notariadu, Lúcia mós hetan oportunidade hodi tuir formasaun semana ida kona-ba Programa Arkivu Nasionál nian no hetan sertifikadu. Nia mós partisipa tan formasaun fulan ida iha Science of Life System (SOLS) no hetan mós sertifikadu apresiasaun.

Ho nune’e, nia husu ba maluk feto no mane analfabetu sira ne’ebé maka hakarak tuir Programa Alfabetizasaun ne’e bele aproveita no labele husik liu oportunidade ne’ebé iha. Labele moe atu aprende tanba programa ne’e bele hariku ema nia koñesimentu.

Koordenadór Programa Alfabetizasaun Munisípiu Dili, Felismeno de Araújo, hatete programa ne’e importante duni ba timoroan sira la’ós ba ferik no katuas, maibé mós ba joven sira ne’ebé maka uluk lahetan oportunidade eskola.

Implementasaun programa ne’e husi kooperasaun ho Governu Cuba ne’ebé konsege lori benefísiu boot ba timoroan lubuk ida maka hatene ona lee no hakerek.

“Ha’u atu dehan de’it iha benefisiária ida maka agora hetan fatin di’ak serbisu iha Ministériu Justisa. Nia aprende husi Programa Alfabetizasaun ne’e iha 2008 no agora nia asume kargu importante ida iha ne’ebá”, Felismeno fó sasin.

Ne’e atu hatudu katak ema ne’ebé maka sei iha vontade hakarak aprende nunka iha liafuan tarde ba nia. Buat ne’ebé nia halo ho fuan no laran no tuir duni ho sériu sei iha rezultadu di’ak iha nia moris.

Atu kontinua mellora programa ne’e hodi bele benefisia ba to’o ema hotu maka koordenadór ne’e halo hela kampaña alfabetizasaun iha Dili, iha postu lima hodi atrai liután konfiansa komunidade nian ne’ebé maka seidauk sai benefisiáriu ba programa ne’e hodi bele partisipa direita atu país iha futuru bele deklara aan livre husi analfabetizmu.

Atu sai nasaun livre husi lahatene hakerek no lee, dirijente ne’e dehan tenke luta maka’as nune’e bele kore povu husi moris ida nakukun ba hetan naroman liuhusi prosesu aprendizajen ne’ebé formál atu loke sira-nian hanoin hodi hakat bá oin.

Jornalista: Tomé Amado   

Editora: Maria Auxiliadora

iklan
iklan

Leave a Reply

iklan
error: Content is protected !!