DILI, 12 setembru 2023 (TATOLI) – Ministru Interiór Francisco da Costa Guteres, hateten aban (13/9), sei aprezenta proposta reativasaun ba membru reformadu Polísia Nasionál Timor-Leste (PNTL) na’in-158 ba Konsellu Ministru (KM).
“Aban kuarta-feira, ha’u aprezenta ona iha Konsellu Ministru. Aban ne’e, ami rezolve hotu ona iha Konsellu Ministru”, Francisco ba jornalista sira iha Ministériu Finansas, tersa, ohin.
Governante ne’e hateten, hanesan membru Governu ne’ebé responsavél ba área seguransa ne’e sei hato’o proposta dekretu lei ida atu bele rezolve problema membru PNTL reformadu na’in-158.
“Aban iha Konsellu Ministru, sei hamosu dekretu-lei ida, para hodi bele rezolve problema ne’e hotu kedas, nune’e bele reativa fali ita-nia membru PNTL sira ne’e hosi sira-nia servisu inklui sira-nia saláriu, ne’ebé aban ne’e ita rezolve hotu ona”, Governante ne’e hateten.
Nia dehan, kuandu Konsellu Ministru deside no reativa hikas membru PNTL 158 ba fali servisu hanesan baibain, Komandu Jerál PNTL ezekuta desizaun ne’e hodi simu fila fali sira atu assume fali funsaun iha instituisaun PNTL.
“Lae. Komandu atu simu ordém, Komandu implementa polítika Governu nian”, nia afirma.
Iha 28 juñu 2023, Komandu Jerál PNTL, Komisáriu Jerál Polísia Henrique da Costa ofisialmente reforma membru PNTL 158 ba vida sivíl.
Jornalista: Natalino Costa
Editór : Zezito Silva
