DILI, 12 setembru 2023 (TATOLI)–Ministru Asuntu Kombatente Libertasaun Nasionál (MACLN), Gil da Costa Monteiro “Oan Soru”, segunda (11 setembru) ne’e, asina plaka levantamentu Forsa Armada Libertasaun Nasionál Timor-Leste (FALINTIL) asalta postu Baguia ne’ebé lidera hosi Mau-Hudo iha 11 agostu 1980.
Notísia Relevante: Simu telefone ba hasoru Wiranto, Mau-Hudo ba la fila-mai
“Ita-nia pasadu ne’ebé moruk, reafirma ita prenzente ne’ebé ohin projeta ita-nia futuru no nasaun nia futuru hanesan minstru no kombatente labele apresia ba nia an rasik, husik ema seluk mak apresia maibé relembra ita-nia pasadu ne’ebé moruk, reafirma prenzente ne’ebé ohin projeta ita-nia futuru no nasaun nia futuru tanba futuru ne’e mak husik hela ba iha jerasaun foun no povu ida ne’e,” Governante ne’e hateten liuhosi nota imprensa ne’ebé Agência Tatoli asesu, tersa ne’e.
Hanoin hikas pasadu, nia dehan, la’ós atu tuku hirus matan no relembra pasadu la’ós atu lulun faru liman maibé relembra pasadu atu fera ulun no mai ema hotu hamrik hodi valoriza istória pasada, hametin fiar no projeta futuru nasaun ho povu ida-ne’e.
“Nasaun ne’ebé riku ho istória maibé ninia sidadaun rasik ki’ak ho istória, ida-ne’e siknifika ita laiha vizaun ne’ebé di’ak,” Oan Soru hateten.
Veteranu Oan Soru ne’e hateten, hanesan ministru mós sei la’o to’o iha fatin hotu-hotu hodi husu sira seluk atu banati tuir maibé iha liafuan ida mak hakarak temi labele temi eroi Baguia, maibé temi eroi patria Timor.
“Laiha eroi postu, laiha eroi suku nian maibé hotu-hotu eroi martir libertasaun nasionál. Eroi ida laiha eskalaun, eroi ne’e iha ida de’it,” nia hateten.
Reprezentante Prezidente Autoridade Munisípiu Baucau, Sekretáriu munisípiu Baucau, Simão Pinheiro, hateten levatamentu armada FALINTIL halo asaltu iha postu Baguia hanesan memória ida sei rai metin iha povu Baguai hanesan istória ida.
“Pertenente tebes ho ita-nia sorumutu iha lororn ohin, hodi hanoin hikas ba ita-nia eroi sira-nia asaun iha 11 agostu 1980 no 30 agostu 1983. Hanesan lori istória pasada ida-ne’ebé moruk, ho tristeza lori sofrimentu ne’ebé povu Baguia hasoru, ohin ita selebra ba tinan 47. Ida-ne’e hafanu ita-nia memória atu hanoin hikas katak ita-nia nasaun iha istória padafa ne’ebé moruk no midar mak ita sente,” nia dehan.
Atu hanoin hikas memória hirak ne’e, veteranu Baguia no AMRT organiza serimónia refere iha suku Haeconi Postu Administrativu Baguia munisípiu Baucau.
Levantamentu Forsa Armada Libertasaun Nasionál Timor-Leste (FALINTIL) asalta postu Baguia iha 11 agostu 1980 ne’e, organiza hosi falintil no frente klandestina sira hodi halo asaltu ba iha postu militár Indonézia iha Baguia iha 11 agostu 1980 ne’e, lidera husi saudozu Mau-Hudo Ran Kadalak, Miguel Guterres (Nahadasi), Júlio da Costa (Besi Taur Rubi), Agustinho Soares (Kai Naha), António Mariz (Mausahe), Felisberto António Ribeiro (Rama Hana), Luciano Dias Ximenes (Watumisa), Domingos Belo (Maukuta), Degu Wai (Mauriba), Domingos (Mau Rade) Domingos Watulari no Domingos Menezes.
Ihaserimónia asina plaka ne’e partisipa hosi Vise-Ministru Asuntu Parlamentár Adérito Hugo da Costa, Vise Prezidente CCLN Marito Reis, Diretór Ezekutive & Prezidente AMRT Antoninho Baptista Alves “Hammar”, Komandatnte PNTL munisípiu Baucau Superintende António Mauluta, Xefe Gabinete MACLN Nilton das Neves, Sekretáriu Munisípiu Baucau, Pároku Baguia, Madre sira, F-FDTL no komunidade Baguia.
Notísia Relevante: Tinan 1999: Rona rádiu “Mau-Hudo” ba Kupang, “Mau-Huno” monu dezmaia
Jornalista : Osória Marques
Editór : Cancio Ximenes
