PNTL-DNTT sei pinta zebra cross iha estrada ESG Dom Martinho Lopes
MALIANA, 12 setembru 2023 (TATOLI)-Komandu Polísia Nasionál Timor-Leste (PNTL) Munisípiu Bobonaro, sei koordena ho Diresaun Transporte Terrestre (DNTT) planea sei pinta pasadera ka zebra cross iha estrada públiku aredor Eskola Sekundáriu Jerál (ESG, sigla Portugués) númeru I Dom Martinho da Costa Lopes Maliana.
Komandante Komando Polísia Nasionál Timor-Leste Munisipiu Bobonaro, Superintendente Xefe, António Maria de Sá, hateten planu ne’e hodi responde pedidu ne’ebe aprenzenta hosi dirijente eskola ne’e ho rajaun atu fasilita estudante sira bainhira halo movimentu estrada públiku iha areador eskola refere.
Notisia Relevante:Dom Martinho Lopes, eskola dahuluk iha Bobonaro implementa ‘Eskola Verde’
“Ha’u sei enkamiña ba prezidente autoridade no mós ko’alia ho Diretór DNTT para eskola oin ne’e tenke halo Zebra Cross tanba estudante barak entaun sai mai iha kedas dalan protokolu, dalan públika, entaun ida ne’e mós fó risku ba vida estudante sira-nian entaun ita halo Zebra Cross para momnetu estudante sira sai iha direitu atu ultrapasa ba mai,”Nia informa ba Jornalista sira iha Komandu PNTL Maliana, segunda ne’e.
Iha parte seluk, Superintendente Xefe, António de Sá informa ho kolokasaun Ofisiál Polísia Eskola (OPE) ba eskola públiku ne’e iha tinan kotuk maka prevene ona konfiltu entre estudante ho estudante no mós estudante ho komunidade sira.
“Diretór Eskola Dom Martinho ohin konfesa mai ha’u katak desde ita koloka OPE laiha tan problema, situasaun normál,” nia hateten.
Iha sorin seluk, Bonifácio Agustu de Jesus, nu’udar aman hosi estudante, espera katak PNTL ho DNTT bele realiza duni planu ne’e iha tempu badak.
“Ami inan-aman durante ne’e la’o ba mai preukupa loos tanba labarik sira sai mai ne’e nadodon, ema hosi Warung Bakso nia mós barak, motór para barak, dalan mós klot dalaruma ita halai oin makanas bele soke sala tia balu, ne’ebé ami agradese dehan Polísia atu tau zebra cross ne’e para ami-nia oan sira bele la’o ho di’ak,”nia hateten.
Entretantu, tuir dadus totál estudante Dom Martinho da Costa Lopes Maliana ba tinan leitvu 2023 hamutuk na’in-2.752 inklui klase paralelu Balibo 3.024 ho totál profesór na’in-60, komposta hosi permanente na’in-53 no kontratadu na’in-hitu.
Notisia Relevante:Eskola DMCL Maliana hapara ona kobransa ba estudante sira
Jornalista: Sergio da Cruz
Editór: Agapito dos Santos
