DILI, 12 setembru 2023 (TATOLI)—Prezidente Tribunál Rekursu (TR), Deolindo dos Santos, husu deputadu sira iha lejislatura daneen atu kumpre prazu deklarasaun rikusoin ba iha Tribunál Rekursu (TR) to’o iha 15 setembru 2023, tanba lei Medida Prevensaun no Kombate Korrupsaun (MPKK) mak obriga.
“Ohin, kestaun ne’ebé aborda relasiona ho prosesu ne’ebé la’o hela ba deklarasaun rikusoin Deputadu sira-nian, ne’ebé iha korespondénsia no notifikasaun balun ne’ebé la’o tiha ona. Entaun, ko’alia ho Prezidente Parlamentu Nasionál ho Vise Prezidente, atu Deputadu sira bele kumpre buat ne’ebé iha lei ne’e rasik,” Prezidente Tribunál Rekursu, Deolindo dos Santos, hateten ba jornalista sira hafoin ramata enkontru ho Prezidente Parlamentu Nasionál, Maria Fernanda Lay, iha PN, tersa ne’e.
Iha enkontru ne’e ko’alia oinsá deputadu sira bele kumpre tuir lei ne’ebé iha, tanba lei ne’e Deputadu sira mak halo, entaun husu atu kumpre ida-ne’e, no bainhira la kumpre sempre iha konsekuénsia legál ne’ebé lei ne’e hatete, tanba lei iha ona ne’e Tribunál ho juis sira kumpre de’it.
“Korespondénsia ba-mai no sira (PN) rasik até husu proroga tan prazu prienxe deklarasaun. Maibé iha semana liu ba, ha’u fó resposta katak laiha tan ona prorogasaun ona tanba prazu hotu ona,Pelumenus fulan tolu, tempu sufisiente ona sira bele halo ida ne’e, entaun prazu sei hotu iha 15 setembru,” nia hateten
Jornalista : Nelson de Sousa
Editór : Cancio Ximenes
