Autoridade Covalima aprezenta problema infraestrutura bázika ba komisaun E PN
COVALIMA, 13 setembru 2023 (TATOLI)–Autoridade Covalima liuhosi administradór postu administrativu no diretór munisipál aprezenta problema infraestrutura bázika iha Covalima ba komisaun E Parlamentu Nasionál ne’ebé trata asuntu infraestrutura.
Sekretáriu Administradór Munisípiu Covalima, Francisco de Jesus Alves, hateten Diretór munisipál no administradór aprezenta problema infraestrtura hanesan problema bee-moos, Estrada, eletrisidade, saúde no edukasaun ba komisaun E parlamentu nasionál.
“Ha’u hakarak hato’o ba ita-boot sira autoridade Covalima simu vizita traballu hosi komisaun E Parlamentu Nasionál hodi realiza enkontru. Ita-nia administradór postu administrativu no diretór munisipál hato’o preokupasaun kona-ba infraestrutura bázika iha munisípiu Covalima,” Francisco de Jesus Alves hateten ba Jornalista sira iha AMC, Sukaer Laran, kuarta ne’e.
Administradór postu administrativu sira aprezenta problema sira hanesan estrada, bee-moos no eletrisidade ne’e falta suku ida rua de’it mak la asesu ona, maibé estabelesimentu liña eletrisidade la’o hela nune’e tempu badak komunidade hotu asesu ona eletrisidade.
Aleinde ne’e, administradór postu administrativu aprezenta problema sira hanesan saúde no edukasaun mós hato’o sira-nia preokupasaun ne’ebé la sees hosi infraestrutura hanesan konstrusaun eskola no klinika.
Hafoin aprezenta preokupasaun hirak ne’e ba deputadu hosi komisaun E parlamentu Nasionál, deputadu sira mós sei hato’o preokupasaun hirak ne’ebé aprezenta hosi administradór postu no diretór munisipál sir aba ministériu kompetente atu tau iha konsiderasaun.
Prezidente Komisaun E Parlamentu Nasionál, Marcos Xavier, hateten Komisaun E parlamentu Nasionál nia prezenta mai iha Covalima atu hala’o enkontru hodi rona administradór postu sira aprezenta probelema sira iha terrenu, atu oinsá IX Governu Konstitusionál bele fó atensaun ba problema infraestrutura.
Hafoin Komisaun E Parlamentu Nasionál finaliza enkontru ho administradór postu administrativu no diretór munisipál sira, deputadu-sira kontinua hala’o fiskalizasaun ponte kotu no estrada ne’ebé aat afeta hosi dezastre Naturál.
Jornalista : Celestina Teles
Editór : Cancio Ximenes
