Top

Konsellu Ministru aprova atribuisaun donativu millaun $2,5 ba Reinu Marrokus

Kondisaun edifísiu sira iha Reinu Marrokus hafoin rai nakdoko. Imajen/AP

DILI, 13 setembru 2023 (TATOLI)—Governu liuhosi reuniaun Konsellu Ministru, kuarta ne’e, aprova projetu rezolusaun ne’ebé aprezenta hosi Primeiru-Ministru, Kay Rala Xanana Gusmão, kona-ba atribuisaun donativu ba Reinu Marrokus ho montante millaun $2,5.

Antes ne’e, akontese rai nakdoko ho magnitude 6,8 iha Reinu Marrokus, iha sesta kalan, loron 08 setembru, ne’ebé mosu destruisaun boot no rezulta ema mate 2.800 no kanek 2.500.

Governu Timor-Leste lori povu nia naran hato’o solidaridade profunda ba povu no Governu Reinu Marrokus, ne’ebé sofre efeitu hosi dezastre naturál ne’e.

“Ami-nia hanoin no orasaun hamutuk ho Sua Majestade, ita-nia Governu no povu Reinu Marrokus durante períodu difísil ida-ne’e, no garante katak Timor-Leste prontu atu fornese asisténsia adisionál saida de’it ne’ebé karik presiza, no ami-nia espetativa atu serbisu hamutuk ho Governu iha loron no semana sira tuir mai,” Primeiru-Ministru, Kay Rala Xanana Gusmão, hateten liuhosi karta kondolénsia ne’ebé haruka ba Sua Majestade Rei Mohammed VI.

Notísia relevante : Governu aprova tan donativu ba reprezentasaun permanente Repúblika Árabe Saaraui

Rai nakdoko ida-ne’e boot liu iha Marrokus, hosi kedas rai nakdoko estraga sidade Agadir, iha tasi-ibun osidentál país ne’e iha tinan 1960, ne’ebé hamate ema liu rihun 12.

Nune’e mós, Portavós Governu no Ministru Prezidénsia Konsellu Ministru, Agio Pereira, hato’o ninia sinsera kondolénsia ba povu no Governu Reinu Marrokus.

“Felisita ema hotu ne’ebé kontinua determinadu hodi buka sobrevivente sira no apoia ba populasaun sira ne’ebé afetada hosi katástrofe ida-ne’e,” Agio tenik.

Jornalista      : Antónia Gusmão

Editora           : Julia Chatarina

Publisidade

Leave a Reply

Latest Post

error: Content is protected !!