PPN-Madre Guilhermina diskute dezenvolvimentu joven iha responsabilidade-integridade
DILI, 13 setembru 2023 (TATOLI)—Prezidente Parlamentu Nasionál, Maria Fernanda Lay, kuarta ne’e, simu audiénsia ho Madre Guilhermina Marçal hodi diskute konaba preokupasaun atuál ne’ebé nasaun hasoru kona-ba estabilidade, dezenvolvimentu joven sira-nian oinsá haree perspetiva ba oin atu prepara joven sira iha responsabilidade no integridade.
Madre Guilhermina Marçal hateten, enkontru ida-ne’e hanesan enkontru amigável hodi hato’o saudasaun no akompañamentu ho orasaun ba kna’ar Prezidente Parlamentu Nasionál aumezmu tempu orgulu ida tanba feto dahuluk sai Prezidente Parlamentu ne’ebé bele lori impaktu pozitivu.
“Ami ko’alia preokupasaun kona-ba pás estabilidade nasionál, dezenvolvimentu joven sira ohin loron nian haree perspetiva di’ak oinsá hanoin ba futuru ida-ne’ebé prepara ita-nia foinsa’e sira iha responsabilidade, integridade ba loron aban nian. Hosi parte hotu-hotu, oinsá buka hala’o kna’ar ho didi’ak hodi investe ba ita-nia foinsa’e sira iha parte intelekuál, morál, espirituál, kulturál iha formasaun ne’ebé integrada atu, nune’e bele lao ba oin ho espíritu fiar an tanba futuru nasaun ne’e iha joven sira nia liman,” Madre Guilhermina Marçal, hateten ba jornalista sira hafoin ramata enkontru iha PN.
Tuir nia, joven ohin loron joven sira pasajen idade no joven ne’e iha enérjia barak iha nia aan, entaun haree joven ne’e enejétiku, iha hanoin barak maibé hanoin la’ós negativu nian maibé buat ne’ebé di’ak.
“Maibé nia la alkansa, entaun enerjénsia sira-ne’ebé pozitivu ne’e transforma tiha ba enérjia negative. Tanba ne’e, ita haree hanesan baku malu, sadik malu, tama iha grupu oioin oinsá mak atu bele nia tama iha ne’eba no sira sente hakmatek, nia sente iha forsa liu nia hatene katak tama iha ne’eba nia manan liu, hirak ne’e hotu presiza atensaun,” nia dehan.
Aliénde tuir mai haree kampu traballu menus loos iha Timor-Leste, joven sira hafoin ramata estudu lisensiadu iha universidade kampu traballu laiha.
Ida-ne’e hotu sai impaktu ida-ne’ebé disturbia ita nia komunidade ninia moris loro-loron nian. “Iha parte seluk haree katak, labarik sira balun ne’ebé lakon no drop out, bainhira ita la akompaña didi’ak nia mak hanoin ida ne’e, nia an mak la serve, buat hirak ne’e hotu halo iritasaun iha joven sira fuan no laran hodi sai joven ne’ebé brutal iha ita nia sosiedade,” Nia hateten
Ho natureza joven sira la’ós aat maibé so hahalok mak aat,ne’ebé hanoin iha buat barak presiza hadia iha moris foinsa’e sira nian.
No liliu ba inan sira mós presiza hola atensaun ba dezenvolimentu oan sira, katak akompañamentu ba oan sira ko’alia ho oan sira ne’e importante, tanba dalabarak preokupa ho buat seluk.
No hosi parte edukasaun nia importante atu muda ema nia karatér atu transforma nia, maibé parte seluk ita haree karénsia morál iha ita nia sosiedade respeita malu.
Jornalista : Nelson de Sousa
Editór : Cancio Ximenes
