DILI, 13 setembru 2023 (TATOLI) – Diretór Servisu Nasonál Ambulánsia Emerjénsia Médika (SNAEM.IP), Horacio Sarmento, informa sei entrega iha tempu badak, kareta ambulánsia 23 ba patrimóniu Estadu tanba avaria no labele hadia ona.
“Durante ne’e ita-nia karreta ambulánsia ne’ebé movel tula ema moras sira iha munisípiu inklui nasionál hamutuk 52, husi ne’e kareta ambulánsia 23 mak aat no labele hadia ona tanba kareta tuan dezde uluk kedas, entaun ami koordena ho patrimóniu estadu para entrega”, Horacio Sarmento informa ba TATOLI, iha nia kna’ar fatin, Caicoli, ohin.
Nia dehan, ambulansia ne’ebé sirkula hotu iha munisípiu inklui Dili hamutuk 20-resin maibé ida ne’e la sufisiente atu atende ba pasiente sira iha teritóriu nasionál.
“Agora ami-nia númeru loloos ambulansia ne’ebé mak funsiona ho di’ak ne’e iha 20-resin, kareta ambulánsia, ne’e sirkula iha munisípiu hotuhotu inklui Dili, entaun ambulánsia ne’ebé mak agora daudauk iha ne’e la sufisiente”, nia dehan.
Nia haktuir, karreta ambulánsia ba kada munisípiu mínimu iha rua maibé tuir planu estratejia to’o iha 2027, iha munisípiu tenke mínimu haat ba kada munisipiu atu bele responde ba nesesidade populasaun nian.
“Númeru transferénsia ba pasiente mai Dili ne’e agora daudauk makas, entaun ambulánsia balun tula pasiente mai Dili, balun hela, para sira bele troka malu, se ambulánsia ida de’it, bainhira sira tula tiha pasiente mai to’o tiha Dili, depois sira ba tula tan pasiente ida ne’e dala ruma fó risku ba ami tanba ne’e ami husu ba oin presiza aumenta tan kareta ambulánsia ida ne’e”, nia afirma.
Horacio esplika, kona-ba rekursu humanus, agora daudauk seidauk sufisiente iha munisípiu sira tanba pesoál sira ne’e kontratu ho orsamentu covid-19 nian, entaun dezembru parese sira para hotu tanba kontratu remata no covid mós la iha ona.
“Tanba ne’e tinan oin, ami sei propoen orsamentu para bele kontratu fali ho sira, atu reforsa iha nasionál, tanba iha planu atu tau tan estasaun iha fatin sira ne’ebé mak risku ba asidente, depois munisípiu mós tenke reforsa hanesan, médiku, tanba munisípiu sira iha enfermeiru de’it, entaun ita aumenta tan médiku, parteira sira para iha buat ruma ba inan isin rua sira bele atende daudaun ona depois to’o iha fasilidade saúde sira”, nia sujere.
Tuir planu, SNAEM.IP iha 2024 sei sosa tan kareta ambulánsia lima hodi reforsa tan servisu atendimentu ba populasaun sira iha Tmor-Leste.
“Ami-nia planu ba 2024 ne’e atu hola tan ambulánsia lima, ne’ebé kada tinan tenke hola ambulánsia lima, ne’e para to’o tinan 2027 kada munisípiu sira bele iha ona ambulánsia haat hanesan ne’e hodi responde ba komunidade sira”, nia subliña.
Iha sorin seluk, Ministra Saúde Elia dos Reis Amaral, dehan tempu badak Ministériu Saúde sei halo mapeamentu ba ambulánsia ne’ebé mak iha tiha ona no ambulánsia ne’ebé mak aat no ambulansia ne’ebé mak la funsiona.
“Ami sei propoen iha orsamentu 2024 nian, atu nune’e ida ne’ebé mak sai prioridade atu sosa kareta ambulánsia. iita halo tiha mapeamentu mak ita haree ba ida ne’ebé mak prioridade ba ita bele koloka osan ba tinan oin”, Elia dos Reis Conklui.
Jornalista : Felicidade Ximenes
Editór : Zezito Silva
