VIQUEQUE, 12 setembru 2023 (TATOLI)-Uma-kain 100 hosi aldeia Matau no Baha-Buga suku Vessoru, postu adiministrativu Uatulari, munisípiu Viqueque, tenke la’o ain kuaze killometru ida hodi bá kuru bee moos tanba problema falta be’e moos.
“Durante ne’e ami-nia aldeia rua aldeia Matau no Baha-Buga totál uma-kain 100 maka seidauk asesu ba bee-moos. Enkuantu aldeia sira seluk ne’e kanizasaun bee-moos nian iha maibé agora bee nian debit atu mai iha suku maka la forsa, ho nune’e ami tenke ba kuru bee matan rua hodi komsumu,” Hateten Lideransa komunitária, suku Vessoru, Chiquito Lopes, ba jornalista sira iha suku Vessoru, tersa ne’e.
Tuir dadús hosi sensu uma-kain 2015 rejista populasaun husi suku Vessoru, aldeia hitu kompostu husi Balabasiba, Mau-Boru, Culu-Dere, Baha-o, Uani-Uma, Baha-Buga, Matau ho Totál populasaun hamutuk 1.519 kompostu hosi mane 785 no feto.
Hosi populasaun aldeia hitu ne’e aldeia lima asesu ona sistema kanalizasaun bee moos ne’ebé konstrui hosi projetu Programa Nasionál Dezenvolvimentu Suku (PNDS), maibé iha tempu bai-loron forñesimentu bee moos la sufisente ba uma-kain hotu hotu.
“Iha ne’e tempu udan bee-moos sufisiente maibé tama tempu bailoron hanesan agora dadaun ne’e bee laiha, nune’e ami tenke buka bee ba rekursu bee matan rua ne’ebé lokaliza iha suku Vessoru agora ne’e ha’u-nia populasaun sira preokupa tebes ba bee-moos,”nia hateten.
Kestaun falta bee moos ne’e, nia dehan kada tinan komunidade sira sempre enfrenta problema ne’e, tanba ne’e Konsellu Suku tau ona iha planu Programa Nasionál Dezemvolvimentu Suku iha futuru.
“Ba preokupasaun bee-moos ne’ebé ami enfrenta ne’e ami konsellu suku tau ona iha planu PNDS no pedidu ba munisípiu ne’ebé sei prosesu implementasaun tanba ami-nia hakarak hadi’a rekursu bee ne’e iha atu kanaliza mai suku,” nia hateten.
Jornalista: Vitorino Lopes da Costa
Editóra : Agapito dos Santos
