DILI, 14 setembru 2023 (TATOLI) – Ministériu Edukasaun Superiór, Siénsia no Kultura (MESSK) iha programa prioridade rua ne’ebé sei implementa iha tinan oin mak fó bolsa estudu ba dosente sira iha nivel mestradu no doutoramentu nomós formasaun língua portugeza.
“Ami sei tau prioridade iha Orsamentu Jerál Estadu 2024 nian ba programa bolsa estudu no disponibiliza formasaun língua portugeza ba dosente husi institutu públiku no privadu iha territóriu hodi hasa’e sira-nian koñesimentu no garante kualidade edukasaun iha futuru”, José Honório hatete iha Palásiu Governu.
Prioridade ministériu nian hodi investe iha formasaun ba dosente sira ne’e tanba sira mak sei transmite siénsia ba estudante sira no banihira alunu sira remata estudu bele iha kualidade no bele kompete iha merkadu traballu iha nasaun seluk.
“Tanba Timor-Leste prepara atu tama ba ASEAN, entaun presiza prepara rekursu ho kualidade hodi kompete ho nasaun seluk”, dehan.
Atu garante kualidade edukasaun iha ensinu superiór maka MESSK mós kria ona Komisaun koordenadora Universidade no Institutu Superiór ida atu tau-matan ba universidade sira hodi hasa’e nia kualidade ensinu.
Aleinde garante kualidade edukasaun, ministériu sei investe mós ba infraestrutura, tanba polítika Governu maka fornese ekipamentu adekuadu ba ensinu superiór no institutu públiku no privadu iha tinan lima nia laran.
Programa Governu nian ba ensinu superiór mak reforsa kualidade ensinu iha institutu no universidade públiku no privadu; kontinua reforsa programa Bolsa Estudu, liuhusi Fundu Dezenvolvimentu Kapitál Umanu hodi fó resposta ba área estratéjika sira ba dezenvolvimentu nasaun; reforsa kapasidade Ajénsia Nasionál ba Avaliasaun no Akreditasaun Akadémika atu promove avaliasaun kualidade no akreditasaun ba estabelesimentu ensinu superiór; kontinua reforsa kualidade ensinu iha Universidade Nasionál Timor Lorosa’e, inklui kriasaun kursu foun ajusta ba nesesidade dezenvolvimentu sosioekonómiku país nian, no seluk tan.
Jornalista: Tomé Amado
Editora: Maria Auxiliadora
