COVALIMA, 14 setembru 2023 (TATOLI)–Koordenadór Bee Timor-Leste, Empreza Públiku (BTL, E.P) Covalima, Castro Dody Ramos, hateten hahú fulan-janeitu to’o fulan-agostu tinan 2023 ne’e, BTL, E.P Covalima konstribui ona reseita $14.000 ba kofre Estadu.
” BTL, E.P Covalima kontribui reseita ba kofre Estadu ne’e ninia fonte mai hosi kliénte iha munisípiu Covalima ne’ebé kontribui selu osan kada fulan,” Castro Dody Ramos hateten ba Agência Tatoli, iha resintu AMC, kinta-ne’e
Nia hateten, durante tékniku sira kobra osan hodi selu maibé kliénte sira asesu bee-moos seidauk di’ak, nune’e BT, E.P konsidera no kontinua esforsu hodi mellora sistema bee-moos ba komunidade ho di’ak-liu.
“Atu mellora sistema bee-moos ho di’ak-liu, ita postu Suai iha bee-matan ida mak funsiona, nune’e hein katak Governu bele finaliza hodi mellora bee-matan rua atu reforsa nune’e komunidade bele asesu bee-moos di’ak-liu,” nia dehan.
Maske, tuir nia, BTL, E.P aplika ona tarifáriu ba kliénte ne’ebé asesu bee-moos ladún normál tanba maoiria sistema bee-moos tuan hotu, nune’e kliénte sira asesu bee-moos ladún normál no depende ba débitu bee-moos nian.
Aleinde ne’e, koordenadór BTL, E.P ne’e relata reseita iha tinan 2022 ne’ebé BTL, E.P kontribui $11,00 ba kofre Estadu.
Tuir dadus ne’ebé Agência Tatoli asesu, komunidade ne’ebé hela iha área urbana iha uma-kain 1,665 ho totál populasaun 10,965 ne’ebé asesu ona bee-moos.
Jornalista : Celestina Teles
Editór : Cancio Ximenes
