iklan

DEFEZA, HEADLINE

Falur husu públiku labele duvida ho ezonerasaun Klamar Fuik 

Falur husu públiku labele duvida ho ezonerasaun Klamar Fuik 

Xefe Estadu Maiór Jenerál F-FDTL, Falur Rate Laek. Imajen Tatoli /Egas Cristovão.

DILI, 14 setembru 2023 (TATOLI) – Xefe Estadu Maiór Jenerál Forsa Armadas (F-FDTL), Tenente Jenerál Domingos Raúl ‘Falur Rate Laek’ husu ba públiku atu lalika duvida ho ezonerasaun ne’ebé Komandu F-FDTL liuhosi Prezidente Repúblika halo ona ba Pedro Klamar Fuik.

Nia dehan, mosu duvida no preokupasaun oioin katak Donaciano Costa Gomes Pedro ‘Klamar Fuik’ molok ne’e Prezidente Repúblika ezora de’it hosi nia kargu hanesan Xefe Estadu Maiór Forsa Armadas (XEMFA), maibé la ezonera nia hosi militár ativu.

Tanba ne’e, bainhira mandatu haesan Ministru Defeza remata, Donaciano Costa Gomes Pedro ‘Klamar Fuik’ sei kontinua ba fali vida militár.

Tenente Jenerál F-FDTL ne’e husu ba públiku atu lalika preokupa no duvida ho kestaun Pedro Klamar Fuik tanba hanesan Instituisaun F-FDTL iha nia dirijente atu dirije no halo jestaun ba ida ne’e.

“Sé mak dehan seidauk ezonera, nia ne’e ezoneradu tiha ona. Ne’e ha’u mak hatene, ha’u mak halo jestaun iha laran ne’e. Defaktu ne’e nia (PedroKlamar Fuik) ne’e ezoneradu, tanba ne’e, nia sai ona, asume ona pasta iha ministériu”, nia dehan.

“Aban bain rua atu hasai nia, la hasai nia ne’e ha’u mak hatene. Ne’e jestaun ha’u nian. Nia (Pedro Klamar Fuik ) atu tama fali ka la tama fali ne’e, ha’u mak hatene. Ne’e lei mak fó forsa ba ha’u dehan Jenerál mak iha kompeténsia atu halo ida ne’e”, Falur Rate Laek hateten ba jornalista sira iha unidade Polísia Militár Kintál Boot, kinta ne’e.

Falur hateten, institusaun militár ne’e iha nia lider atu rezolve no hatene atu lidera. Tanba ne’e,  públiku lalika kabun moras ba sasan sira hanesan ne’e.

“Lalika kabun moras ba jestaun internu institusaun ida ne’e, institusaun ne’e tau ema lider para atu hatene jere. Nia hatene halo ida ne’e no ida ne’ebá”. nia adianta.

Lider institusaun F-FDTL ne’e hateten, momentu ezonerasaun ba Pedro Klamar Fuik ne’e hanesan Komandante F-FDTL nia mak trata administrasaun sira ne’e, tanba ne’e prosesu ba Klamar Fuik los ona no ezoneradu hosi XEMFA.

Proposta ezonerasaun no nomeiasaun ne’e, Tenente Jenerál Falur rasik mak propoen no dilibera iha enkontru Konsellu Superíor Militár no aprova naran ida liuhosi reuniaun Konsellu Superíór Militár rasik, ne’ebé mak envolve hosi Xefe Estadu Maiór Jenerál Forsa Armada (F-FDTL), Vise Xefe Estadu Maór Jenerál Forsa, Xefe Estadu Jenerál Komandante Komponente sira inklui antigu Jerál sira.

Nune’e, Ministru Defeza lori ba aprezenta iha Governu liuhosi Konsellu Ministru dilibera iha Konsellu Ministru aprova depois Governu aprezenta ba Prezidente Repúblika atu dekreta ezonerasaun no nomesaun.

“Ida ezoneradu atu hasai hosi Xefe Estadu Maior ne’e Prezidente mak kompete ba ida ne’e, la’os ha’”, nia dehan.

Hatan kona-ba deviza Pedro Klamar Fuik ne’ebé bolu kontra almirante, Tenente Jenerál Falur hateten, molok nia ba asume pasta hanesan Ministru Defeza iha IX Governu konstitusionál ne’e promovidu ho deviza Kontra Almirante.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!